Read berom Lɛlɛ 66 Bible Online

Lɛlɛ 66 - berom bible

Lɛlɛ 66

¹Lwɛlɛ yaga mwât kyé na lɛlɛ. À yin bemât jey mwa, mok in a Dagwi lwɛlɛ!

²Rá in lwɛlɛ na yōm, na yin nɔng ɛ mɛ nerey. Somo hin hɛ, yē in “Yɛ a sé wo nerey!”

³Yang in Dagwi, “Tomong de hwó ra ba sé pyɛ̂ sap! Bemât repugu mō be vow, be tē guduruk e nuyel mō, yaga reto mō ra sé rerey.

⁴Kawɛ mwat e jey ê re a hwo fongol, bê ra a hwo lwɛlɛ na yōm, ey, bê ra a hwo lwɛlɛ̂ somo.”

⁵Vey in na yin di pyɛ de Dagwi a ga ra, tomong mɛ ba sé a bemasi pyɛ̂ sap!

⁶À tɛ̀ gworep gwo tɛ́ ɛ vwel hwogot, bedabeda mot bà ye dɔ a gworɔt e bol. Yaga pyɛ de à ra, wot à ra nzem e hwomo.

⁷E re negwɔm na gbɔng reto mɛ nesheneshey, e tɛ̀ bayis e ra yére bemât jey. Bemât sogô nehywɛ bē tē naka, yɛn a kwon man gèy na yɛ wɛt!

⁸À yin yére dyuk, somo hin Dagwi mot, tik bemat mwa be wok somo min!

⁹A ga sey neken mot, a tik, na wot a ye bugurɛk wɛt.

¹⁰À Dagwi, hwà ga mara hot, hwà ga rugut hot, sede be rugut dyam.

¹¹Hwà tik ot, wot a gaba e ji segun, ko hwà tɛ̀, wot a tos pyɛ̂ nedirik.

¹²Hwà tik besugâ bedwa be tugut hot, wot a kwey e ji kya na tɛmɛ-nshi. Ko a remo, hwà vey na wot e vwêl pyɛ́ shɛrɛk.

¹³À Dagwi, mê vey e lɔ mō na nenɔrɔ̂ yas burang, na me bin sila vonu hom.

¹⁴Mê nɔng o pyɛ́ de ma ga vo nu e ra yɛ jeng de ma sè e ji reyɔm.

¹⁵Yɛ̄ a yas de ya mɔsɔ naka, tyīmit, bemus, tanga begam. Mê nára yɛ e ra gàgbang rangas, ko nesang hyɔɔlɔl mɛ ne sogo vey na hwo.

¹⁶Mwa yin de yin e sap Dagwi, vey in na yin wok, mê ha a yin pyɛ de yɛ a ga ra a me!

¹⁷Ma yila hɛ yaga sɛlɛ, ko e jeng jining o, ma sè somo hɛ.

¹⁸Ka ma vɔk bare hak ves e yey hom, ka Darwey a yang wet betong na me wɛt.

¹⁹Ko tsak o mwin, Dagwi a wok me, a sey won hom.

²⁰Tik na wot a feng a Dagwi! A ga kyɛ́ ɛ won hom wɛt, a ga tik nà tɛ̀ yey na me wɛt!