Read berom Lɛlɛ 68 Bible Online

Lɛlɛ 68 - berom bible

Lɛlɛ 68

¹Lwɛlɛ̂ Davit. Gwá sè e vwɔ̂ mwât kyé na lɛlɛ. À Dagwi, sogo, na hwo shara vê repugu mo! Tik vemo de be bɛɛ hwo ves be tele.

²Tik vê ragas neves be ye bit e nuyel mō, sede remo de gul gwo wey na sekyeng, kɛ sede remo de negang ne ye ywey bagat na kya arɔng.

³Ko tik bemat berat be vɔk yey pyɛng, be ra nzem yɔkyɔk e nuyel mō, bē ra ayiriri!

⁴Rá in a Dagwi lwɛlɛ, rá in a yɛ lɛlɛ na yōm, rá in lwɛlɛ, na yin somo hɛ, yɛ de e lagsa bale! Reza mɛ à Dagwi Darwey. Rɛ̌ hin e nuyel mɛ na nzem!

⁵Dagwi de a sé e lagwi, a sé dâ nehyɛn, e sɛlɛ bekuma.

⁶E nɔ̂ng vemo de ba vɔk bemat wɛt cáng, e tɛ̀ bemât ngyang washak, e tɛ̀ ɛn, be re nuyel. Ko bemat de be sogo nehywɛ, bê ro ɛn vɔk e hêy gbingiring, kwɔn de bê re vyong.

⁷À Dagwi, jeng de hwà viri bemat mō, jeng de hwà kyè e nuyel mɛn e hêy gbingiring,

⁸vwel ha digis, rwak wa jɛ̀rɛk e nuyel mō, à Dagwi wo Sinai, Dagwi wo BeIsrayɛl.

⁹Jeng de vwel mō ha kyɛ́ ɛ vɔ, hwà tɛ̀ rwak wa rop pyak e ra hɛ, hwà tɛ̀ hɛ, he to ɛ rat o.

¹⁰Bemat mō ba sangal e hwomo, yaga hwà sé wo nerat, hwà sɛlɛ vemo de ba bidɛ sɛlɛ.

¹¹Darwey a nɔng nu, ko beha de ba shara reha mo ba sé pyak, ba tē,

¹²“Begbɔng begwɔ̀m tanga bemât como mɛn ba jut bol! Beha de bá sè e lɔ ba gas pyɛ́ de ba hashe e de como.

¹³Ko vemo de ba ka wɔ̂ tô como wɛt, de ba sangal na kwarâ vyēl mɛn,[24] ba nɔng ɛn pyɛ̂ tɔrɔ arɔng. Yá sè sede bebɔp de ba turu, ba dak bafabak o na dyam pyɛng, babok o ba dak ɛ dyam shinang de ye nɛp.”

¹⁴Jeng de Dagwi Wo Reto Mwa a shara begbɔng begwɔ̀m, a sé sede wula de wa kwey e ra Raku Zalmɔn.

¹⁵Raku Bashan wa sé rwey o tyɔng wɛt, wa sé gwogbɔng gwarwâng beraku.

¹⁶Yaga sɛ́ de gbɔng Raku Bashan o wo ra repugu na Raku Siyɔn ɛ? E wɛ a raku de Dagwi Darwey a ga kasa na a sangal ɛ nesheneshey.

¹⁷À Darwey, Dagwi Darwey, jeng de hwà sogo yi e Sinai wɔ e duk re a hwo fongol, hwà vɔk ɛ bekyɛkyɛ̂ bedwa gu e ra gu vit à yɛnɛ.

¹⁸Jeng de hwà tut vɔk e rak o, hwà vɔk ɛ vemo de hwà re na como, hwà sey pyɛ́ de hwà tɛ̀ ɛn, be tala. Ko vemo de ba simo hwo na sangal e hwomo wɛt, a remo, yɛn e tala hwo pyɛ́ mo arɔng.

¹⁹Tik na wot a somo Darwey, yɛ de e jut nedirik mot kayɛ jeng! Yɛ wɛ a mwât sey ot.

²⁰Dagwi mot e vibis hot. Yɛ Darwey, Dagwi Darwey a vɔk begwong de ê tɔk hywit ot yi e reku.

²¹Ko ê mɔbɔs beratô bemât repugu mɛ, vemo de be kye e de râ pyɛ́ vyes.

²²Darwey a ye, “Mê toyo na yɛn yi e Raku Bashan na yi e tîs gworep ciwil arɔng.

²³Ano, à yin BeIsrayɛl, yin ê bɔrɔs nemi mɛn, bevu min bê re bavîn bemât repugu min o!”

²⁴À Dagwi, gbɔng gwɔ̀m hom, bemat be bɛrɛng kwey mō, hwà sé kyè vɔk e duk re a hwo fongol.

²⁵Bemât lɛlɛ e nuyel, bemât dâk yōm e bama, behwong ba gwɔrɔ hɛn, be dak nebing.

²⁶Lwɛlɛ ma gwomo de yɛn a sé ra: “Somo hin Dagwi Darwey, à yin yére BeIsrayɛl! E ji netula min, somo hin Dagwi!”

²⁷Bɛnyamin, tashal mɛn e nuyel, bemât nuyêl Yuda tanga regyɛng bemat mɛn be raa, bemât nuyêl Zɛbulun na Naftali e tala mo.

²⁸À Dagwi, dura a bemat, hwà vɔk reto. Dura a wot reto de hwà ra mɛ fwom e to mot,

²⁹yi e duk re a hwo fongol e ra rak Yɛrusalɛm.[25] Tik begbɔng begwɔ̀m be vɛ̀sɛ a hwo na nenɔrɔ.

³⁰Gyong Misra, ngyama yane de ya sé e ji sere! Gyong yere bemât jey yane mo! Bemât nuyêl yɛ tanga bemat mɛn ba sé sede kwarâ bemus tanga bebot o. Tɛ̀ ɛn be vey e ji bengyip, na be vey a hwo na dyam pyɛng. Shara bemat vemo de be simo como.

³¹Begbɔng betom bê vey yi e Misra, Bemât Kush bê vey dey-dey, bê nára nenɔrɔ vɔk na Dagwi.

³²Rá in a Dagwi lwɛlɛ, à yin yére bemât jey, ra in a Darwey lɛlɛ̂ somo!

³³Somo hin yɛ de e laga kyɛkyɛ̂ bedwa mɛ e lagwi, lagwi de wà sè gyam pɛrɛ̂ jey. Wok in, e gbɔ sede gbara wo taksal.

³⁴Há in retô Dagwi! E re negwɔm e ra BeIsrayɛl na gbɔng nerey, lagwi wo dura reto de a vɔk.

³⁵Dagwî BeIsrayɛl a sé pyɛ sap e duk re a yɛ fongol! E nɔngɔ̂s bemat mɛ gap na reto. Somo hin Dagwi!