Read berom Lɛlɛ 69 Bible Online

Lɛlɛ 69 - berom bible

Lɛlɛ 69

¹Lwɛlɛ̂ Davit. Bē ra gwɛ na fwɔ̂ lwɛlɛ “Bejamûk líli”. Gwá sè e vwɔ̂ mwât kyé na lɛlɛ. À Dagwi, sey me! Nshi na ga wɔ̂ wɔ re me.

²Me kyè wɔ̀ ye pyɔp e ji bwɔrɔk, vit a kwɔn de mê yɛklɛ ɛ bwol. Ma sé e ji nshi ciwil, tɛmɛ-nshi wa ga jut me.

³Ma ga ruru na yila yaga sɛlɛ, fwɔ hom gwa ga ye sɛk. Ma ga ruru e de náras bayis, me gyeng o, à Dagwi hom, na hwo sɛlɛ me.

⁴Vemo de be bɛɛ me ves, vit a tin, ba dal tôt rato hom na nepyak. Bemât repugu hom be shara nebɔs e ra me, ba vɔk gap, be jama be wey na me. Ko pyɛ de ma shigi wɛt — be simo me tala yɛ.

⁵À Dagwi, hwà dun netɔn hom wɛt, banɛn hom ba sé e lɛrɛ e nuyel mō arɔng wɛt.

⁶À Darwey Dagwi Darwey, Dâ Jey Mwa, à Dagwi wo BeIsrayɛl, hwo tik vemo de be sɛt yey e ra hwo, vemo de be re a hwo fongol, be wok rekyen yaga me wɛt!

⁷A sé yaga hwo de ba ga dusa me, rekyen ra ga kyiri me.

⁸Ma ga tɛ́ me mwat duk e tê cáng hom, begwa jim hom ba ka tɔk me mwa wɛt.

⁹Té ngyɛ́k de me tē yaga lɔ mō ha ga sɔ́ me hywiri. Jeng de bemat ba dusa hwo, ko ba ga dusa me à wane.

¹⁰Jeng de ma tosho, na tik rê pyɛ́, ko mwa ano ba woros me.

¹¹Jeng de ma tɛ̀ rugû sesin, ma tɛ́ me pyɛ shɛgɛsh na yɛn.

¹²Vemo de be sangal e fwam be hwara me, ko bemât sɔ̂ siring be yong lɛlɛ, na be lɛ̄lɛ me mɛ.

¹³Ko me à me, me ra a hwo won à Dagwi Darwey, hanat a me, e jeng de hwà kasa. Hanat a me, yaga hwà tɛ̀ yey na me ding-ding. Ey mwin, hwô kyè wɔ sey me.

¹⁴Pat me yi e ji bwɔrɔk, hwo kwon tik, gwo vo me wɛt! Sey me yi e vê repugu hom! Pat me yi e ji nshi ciwil!

¹⁵Hwo tik tɛmɛ-nshi wo jut me, kɛ nshi ciwil ne re me, kɛ sak wo bang me wɛt.

¹⁶À Dagwi Darwey, hanat a me, yaga tɛ̂ yey mō he tɛ̀sɛ a me nshi e yey! Doyo vey na me na gbɔng nemwishish mō!

¹⁷Hwo lɛrɛ hwo yi na me, sam mō wɛt! Ma sé e ji reyɔm, hanat a me dey-dey!

¹⁸Vey na hwo viri me! Sey me yi e vê repugu hom!

¹⁹Hwà tɔk gwong de be dusa me, be byɛs me, ko be tɛ̀sɛ a me rekyen. Hwà tɔk vê repugu hom mwa.

²⁰Dúsa de me sɔ mo ha ga tɛ̀ yey hom gbɛrɛk, me wok na rebek. Me jama vemo de be wok nemwishish hom, ko vit, me simo vemo de ba rɔda wɔrɔk me, ko ma sɛ̀ gwining wɛt.

²¹Ko vê repugu ba tɛ̀ a me nedɔm e ji pyɛ̂ re, ba nɔng me nshî jwaatat yaga kwɔshɔ̂ yey.

²²Tik pyɛ̂ nzem de be re tanga besa mɛn, ye tɛ́ ɛ a yɛn segun!

²³Tɛ̀ a yɛn ɛ nebǒk! Tɛ̀ berawit mɛn be dopse royo!

²⁴Tabak hɛn na shom mō, tik shom mō de ye tē puu ye hwo e ra yɛn!

²⁵Tɛ̀ be wey na nekwɔn yé ngyɔk mɛn, tik bǔk mɛn be nàra hal!

²⁶Rá pyɛ́ yemo mwa, yaga yɛn e tak a vemo de hwà ga tabak, be simo ha e ra royô barâm de hwà mǎ hɛn.

²⁷Tula banɛn mɛn e ra banɛn, de hwo hala a yɛn wɛt!

²⁸Fugut baza mɛn e bwok-basâ neken, hwo bara hɛn e ji vemo de ba gyeng ha mō wɛt!

²⁹Ko me ma sé pwɛng, me wok na rebek. Sey me, à Dagwi, tik me kwen!

³⁰Ko mê somo hwo na lwɛlɛ, mê nɔng o nerey yi na feng à hwo.

³¹Hemo hê pɛngɛ a hwo yey he dal nára nɔrɔ̂ rɔndɔng kɛ mus de wa ga vey ɛ.

³²Jeng de vemo de ba midra a yɛn ba di ano, ba rɔda vɔk yey pyɛng. Tik vemo de be re a hwo fongol be gwɛ̌ yey ting.

³³À Dagwi Darwey, hwó wokos sesîn bepɛng, ko hwo ye bam na vemo de ba sé e lɔ̂ ngyang wɛt.

³⁴Tik kayɛ pyɛ de ya sé e jey na lagwi ye somo Dagwi, tik berep na kayɛ pyɛ de ya sé e ji vɛ be somo hɛ!

³⁵Yaga Dagwi ê sey Siyɔn, ê to lɔk bapomô Yuda. Ano kwong, bemat mɛ bê to sangal ɛ, bê to se bedâ vwel o.

³⁶Yerê besam mɛ yê re nedanelɔ hɛ, mwa vemo de ba tɛ̀ yey na yɛ bê sangal e hwomo.