Read berom Lɛlɛ 7 Bible Online

Lɛlɛ 7 - berom bible

Lɛlɛ 7

¹Sesîn Davit de a ra vɔk na Dagwi Darwey, jeng de Kush, WoBɛnyamin, a tɛ̀ sekun mɛ À Dagwi Darwey, Dagwi hom, me jama kwɔ̂n dal na hwo, hywit me, sey me yi na vemo de be jama bol hom.

²Ka ano wɛt, bê ye dùlang sede gukum, bê hama me cɛk o cɛk o, vit a mwat de ê tɔk sey me.

³À Dagwi Darwey, Dagwi hom, me, ma ga sey wo repugu hom sana tala.[2] Ko mwa ano, be tē, ma ga buru. Ka sede ma ra ano, ko ma ga row sa hom.

⁵Tik bemât repugu hom be jama bol hom, be wɔ ye kap a me, be bɔrɔs me sɛ̌ ma ku, be hala revin o e vwel!

⁶Ka ano wɛt, à Dagwi Darwey, sogo, tɛ̀ shom e ra yɛn! Bemât repugu hom be tē puu, dul ɛn! Sogo na hwo sɛlɛ me! Tɛ̀ be gas shɔt e tē.

⁷Tɛ̀ mwa yére bemât jey ye tula hɛn, ye gwɔrɔ hwo, ko hwo yɛrɛ a yɛ shɔt yi e hwomo e lagwi!

⁸Hwà sé mwât shɔt mwa yére bemât jey. Yɛrɛ a me shɔt, na hwo dura, ma vɔk tsak o, vit a me na nɛn.

⁹Hwà sé Dagwi de hwo rigim shɔt wɛt, hwó ngyɛgɛt neyey mot, hwà tɔk bare mot. Bemat beves be ragas neves. Dul ɛn, ko gwɛ̌ a bemat de be gyeng ha mō gap.

¹⁰À Dagwi, hwà sé a me sede ruga. Hwó sey vemo de neyey mɛn na sé yɛt.

¹¹Hwà sé mwat de hwó yɛrɛ shɔt e tē, ko hwó tabak vê neves kayɛ jeng.

¹²Ka ba sege begwong mɛn wɛt, hwô lɔ̌ wal mō, hwô ye naw a gbang mō, hwô rene hɛn mɛ,

¹³hwô jut pyɛ̂ como vyes, hwô tɛ̀ kya e nenu ket mō, na hwo tabas mɛ.

¹⁴Di, bemat beves be yongos pyɛ́ vyes e neyey mɛn, bé kyě tɔrɔng e ra yɛ̄, ko e tala mo, bê ra yɛ̄.

¹⁵Bé cing vɔng ciwil, ko bê gaba ɛ pyɛ mɛn.

¹⁶Ano de pyɛ́ vyes mɛn yê hwo e ra yɛn, ko sogô nehywɛ mɛn hê vey a yɛn na baram.

¹⁷Me feng a Dagwi, yaga e gas badu e tē. Me ra a Dagwi Darwey lwɛlɛ na yom, yɛ Dagwi De A Dal Na Reto Mwa.