Read berom Lɛlɛ 71 Bible Online

Lɛlɛ 71 - berom bible

Lɛlɛ 71

¹À Dagwi Darwey, a sé na hwo de me jama kwɔ̂n dal. Hwo tik, me vo rekyen wɛt!

²Hwó ra pyɛ́ de ya sé tɛ̀k kayɛ jeng, sey me dey-dey!

³Tik na hwo sè a me sede gbɔng fwara, kwɔn de me tɔk tele vɔk ɛ kayɛ jeng yaga dal! Hwà ga tɛ̀ e yey na hwo sey me. Ey, e hwo wɛ à fwara hom, à kwɔ̂n dal hom!

⁴À Dagwi, sey me yi e vwɔ vê ragas neves, sey me yi e retô vemo de vit a hɛn na tsak o, ko be tak a bemat.

⁵À Darwey Dagwi Darwey, me sɛt yey e ra hwo, ma tɛ̀ gap e ra hwo yimo me wen.

⁶Yi e tûk tɔ hom, ma tɛ̀ gap e ra hwo, yaga e hwo de hwà vey na me e jey. Me somo hwo kayɛ jeng.

⁷Ma ga tɛ́ me pyɛ ha na bemat pyak, ko hwà sé gbɔng mwât dul hom.

⁸Nu hom ha sila na somo mō, me ha e ra gbɔng nerey mō mwa wosho.

⁹A remo de ma ga kwop, hwo kwon gang me wɛt! A remo de vit a me na gap, hwo kwon ye waa a me wɛt!

¹⁰Yaga bemât repugu hom be ha e ra me, nû vemo de be jama neken hom ha sé hining o.

¹¹Bé tē, “Dagwi a ga ye waa à hɛ! Tik wot a raa bol mɛ, na wot a wɔ ye kap a hɛ. Vit a mwat de ê sey ɛ!”

¹²À Dagwi hom, hwo sè yikyik na me wɛt! Vey sɛlɛ me dey-dey!

¹³Tɛ̀ vemo de be tɛ̀sɛ sekun hom be sɔ rekyen, be wey na yɛn! Tɛ̀ vemo de be simo be mǎ me be tele na rekyen, be tɛ́ ɛn pyɛ byɛs.

¹⁴Ko me à me, mê sɛt yey e ra hwo kayɛ jeng, mê to gwɛ̌ somo hwo pyak-pyak.

¹⁵Mê há a bemat e ra pyɛ́ ryat de hwà ga ra. Kayɛ jeng mê há a yɛn begwong de hwà ga seres hot, mwa ano de nepyak vɛ na dal gâp bára hom.

¹⁶À Darwey Dagwi Darwey, mê somo hwo yaga gbɔng tomong mō, mê ye, hwo nju mō zɔng, hwó ra pyɛ́ ryat.

¹⁷À Dagwi, yimo me wen, hwà ga basa a me, ko vey e yunung, ma sé ha e ra pyɛ̂ bes mō.

¹⁸À Dagwi, a remo de ma ga kwop, to hom ha ga pɛngɛ, hwo ye waa a me wɛt! Ko mê kyɛm me há a nèy na nèy nèy mot yerê reto de hwà vɔk na gbɔng tomong de hwó ra.

¹⁹Hâ tomong rat mō ha wul e lagwi. Hwo de hwà ga ra gbɔng pyɛ́, vit a hwak sede hwo, à Dagwi!

²⁰Hwà ga tɛ̀, ma di reyɔm pyak, ves o, ko mwa ano, hwô pat me yi e sak, hwô to nɔng me neken!

²¹Hwà rɔda gwɛ̌ a me nerey, hwô to hwo wɔrɔk me arɔng.

²²Ano kwong, mê somo hwo na yom kwo, à Dagwi hom, mê somo hwo, yaga hwó sila vonu mō kayɛ jeng. Mê ra a hwo lwɛlɛ na yom shǐ, hwo, wo jɛrɛ wo BeIsrayɛl.

²³Jeng de mê dak a hwo yom, mê mok lwɛlɛ mo na yey pyɛng, yaga hwà ga viri me.

²⁴Mwa wosho, mê ha e ra tomong rat mō. Mê ha e ra vemo de ba jama gaba hom, yɛn a ga tele na rekyen, ba ga tɛ́ ɛn pyɛ byɛs!