Read berom Lɛlɛ 72 Bible Online

Lɛlɛ 72 - berom bible

Lɛlɛ 72

¹Lwɛlɛ̂ Sɔlɔmɔn À Dagwi, basa a gbɔng gwɔ̀m, na a gas badu e tē, basa a yɛ begwong mō de ba sé cik.

²Tik na a bin gas a bemat mō shɔt tyɛng, a kat mɛ vemo de vit a hɛn na mwât sɛlɛ.

³Tik netyang na gâs shɔt e tē ne se e vwel o, wɔ sɛ̀ bemat e berahwol na beraku mwa.

⁴Tik a gas a vemo de vit a hɛn na gap shɔt e tē, a sey bepɛng yi e reyɔm, ko a tɛ̀ vemo de be tak a yɛn buruk.

⁵Tik na a ros[26] gbák de gwi na pwɛl be nɔngɔs negbey, wɔ sɛ̀ mɛ nezamang.

⁶Tik gbɔng gwɔ̀m a sè sede rwak de wo rop e ra hiri, sede rwak de wo cɔ̄rɔng e ra vwel.

⁷Tik gâs shɔt e tē he se pɔk e jeng negwɔm mɛ, ko netyang ne nàra sɛ̌ jey ya ye shǔt.

⁸Tik a re negwɔm yi e yɛnɛ̂ gworep gwomo vɔk e gworo,[27] yi e Gwɔrɔt Ɛifaratɛs vɔk e yɛnɛ̂ jey.

⁹Tɛ̀ yére de ye sangal e hêy gbingiring ye tē guduruk e nuyel mɛ, tɛ̀ vê repugu mɛ be gaba e vwɔ mɛ.

¹⁰Tɛ̀ begbɔng begwɔ̀m Tarshish tanga vê bazik be talsa pyɛ de ba tɛ̀ a yɛn, tɛ̀ begbɔng begwɔ̀m Sheba na Seba be vey a yɛ na nenɔrɔ.

¹¹Tɛ̀ begbɔng begwɔ̀m mwa be ye a yɛ guduruk, mwa yére bemât jey arɔng ye ra a yɛ fwom.

¹²À Dagwi, ra ano, yaga gbɔng gwɔ̀m e sey bepɛng de be tosho yaga sɛlɛ, na vê gawey de vit a hɛn na mwât sɛlɛ.

¹³E wok nemwishish bepɛng na vemo de be sɔ reyɔm, e sey nekên vemo de be re reyɔm.

¹⁴E viri hɛn yi e vemo de be re na yɛn, na vemo de be sogo a yɛn nehywɛ, neken mɛn na sé a yɛ gbɔng pyɛ sizɔng.

¹⁵Nekên gbɔng gwɔ̀m ne ros! Tik be vey a yɛ na dyam shinang yi e Sheba. Tik bemat be ra won yaga yɛ kayɛ jeng, be ra won na Dagwi, a tɛ̀ nerat e ra yɛ kahɛ tuk.

¹⁶Tik pyɛ̂ yéneng ye se shɛrɛk e vwel o wɔ e ra tɛ̂t beraku, tik pyɛ̂ yéneng ye ras naka sede rehwôt Lɛbanɔn. Tik bapomo be gwɛsɛ hɛn na nerat sede sɔng gwim-gwim e hey.

¹⁷Tik be sang ye bam a reza mɛ wɛt, be bare na yɛ sɛ̌ jey ya ye shǔt. Tik yére bemasi mwa ye mok a bemɛn nerat, yerê nerat de Dagwi a ga tɛ̀ e ra gbɔng gwɔ̀m.

¹⁸Bē somo Dagwi Darwey, Dagwi wo BeIsrayɛl! Yɛ nju mɛ de e ra pyɛ̂ bes!

¹⁹Bē somo gbɔng reza mɛ gbak-gbak! Tik be di gbɔng nerey na nerat mɛ e jey mwa! Ano, a sè ano!

²⁰Hemo a yɛnɛ̂ newon Davit, hwêy Yishai.