Read berom Lɛlɛ 73 Bible Online

Lɛlɛ 73 - berom bible

Lɛlɛ 73

¹Lwɛlɛ̂ Asaf Mwin, Dagwi e dura a BeIsrayɛl nerat, a kat mɛ vemo de neyey mɛn na sé haalal.

²Ko mwa ano, ma ga ye me ye waa à Dagwi, bwang o tyɔng na me tik nà tɛ̀ gap e ra yɛ.

³Yaga ma di bemat beves be re nuyel, be dak kaa, ko ma bɛɛ hɛn ves.

⁴Be wok royô pyɛ cak wɛt, ba sé fwerep à hɛn.

⁵Yɛn a vɔk bɔrɔk sede bwâng bemat wɛt, pyɛ cak ye tak a yɛn sede bwâng bemasi wɛt.

⁶Tôs bato mɛn ha ga tɛ́ ɛ a yɛn pyɛ tɔrɔ, dâk kaa ha ga tɛ́ ɛ a yɛn pyɛ̂ re.

⁷Ba mɔsɔ, yéneng bayis mɛn ya ga nusu sul, ba sê bûm barê yông neves vit à yɛnɛ.

⁸Be shɛgɛsh shɛgɛsh byɛ̂s behak, be ha há ves, yɛn e dak kaa, ko be ha neha shisâ bemat.

⁹Be ha sede ba yi e lagwi, sede yɛn vɛ ba vɔk jey.

¹⁰Ko bemat ba sé raa bama mɛn, be paa bayis, be wuma nenu, be wok ɛn.[28]

¹¹Ko bemat beves o be tē, “Dagwi a tɔk ɛ̀ pyɛ cak wɛt. Yɛ de a sé e hwomo, ê tɔk pyɛ cak de ye té e ngamo a?”

¹²Ano de bemat beves ba sé: be gwɛsɛ yele mɛn, ko vit a pyɛ de ye sɛ̀ ɛn.

¹³À Dagwi, a sé zɔng de ma gyeng to hom haalal a? De ma gunung vwɔ hom jaram arɛt?

¹⁴Negasi e ra negasi mɛ sɔ reyɔm, kahɛ tuk he vey a me na yɔ́m pas.

¹⁵Ka ma bare, na me ha sede yɛn de be ha, ka ma yang gas cáng na mwa vemo de ba sé bemat mō.

¹⁶Ma ye ngyɛ́k, na me tɔk pyɛ́ yemo mo, ko ya sé a me negbang sizɔng!

¹⁷Á sè e jeng de ma yel e duk re a hwo fongol zɔng, de ma de tɔk pyɛ de yê sɛ̀ vê neves.

¹⁸Mwin, hwô tɛ̀ ɛn e vwêl tɔlɔt, hwô ro ɛn vɔk e kwɔn de bê wey.

¹⁹E ji jeng jining, bê pere wey na yɛn, yɛnɛ mɛn hê se e gwông bengyip.

²⁰À Dagwi, jeng de hwô sogo, bê ye bit, sede negwi de mwat e ye bam jeng de a sene.

²¹A raane, yey hom yá reneng, nehywɛ hom ná nusu yi e ji hom.

²²Ma tɛ́ me tɔn, vit a netsitsɛng, ma sè sede ngyama e nuyel mō.

²³Ko mwa ano, ma sè tanga hwo kayɛ jeng, hwà kaba vwɔ yege hom.

²⁴Hwó kyè na me, hwó basa a me badu mō, ko e bama mo, hwô sey me e lɔ̂ gbɔng nerey mō.

²⁵Wa de ma vɔk e hwomo e lagwi ɛ? Sɛ̌ hwo zɔng, ko e ngamo e jey, hwo wɛ zɔng de me wok cwey mō.

²⁶Rebek hom na yey hom bê radɛ hɛn, ko hwo, à Dagwi, hwà sé gap hom, hwà sé a me sede nàp hom gbak-gbak.

²⁷Mwin, vemo de ba sé yikyik na hwo bê wey, hwô wey na mwa vemo de ba toyo na bama.

²⁸Ko me à me, a dal a me na nerat na me sangal bagat na hwo. Ma tɛ̀ gap hom e ra hwo, à Darwey, Dagwi Darwey, ko mê ha hâ tomong mō mwa.