Read berom Lɛlɛ 74 Bible Online

Lɛlɛ 74 - berom bible

Lɛlɛ 74

¹Lwɛlɛ̂ Asaf de gwo rɔgɔm. À Dagwi, yaga sɛ́ de hwà ye zak a hot ɛ? Hwô tik ot ano nesheneshey a? Yaga sɛ́ de hwo tē puu na shom na wot ɛ? Wot a sé vyēl mō, ko hwà sé lwek mot wɛt a?

²Bare na bemat mō de hwà viri à raane, vɛ a yere de hwà sey yi e sesam na ye sè myo. Bare na Raku Siyɔn, kwɔ̂n sangal mō.

³Vey, na hwo kyè e barîn duk re a hwo fongol. Di, vê repugu ba ga wey na kayɛ pyɛ gbak-gbak!

⁴Yɛn a mok na gbɔng fwɔ e kwɔ̂n jɛrɛ mō, ba tɛ̀ tuta mɛn, na be dura mɛ wɛng,

⁵Yɛn a tow kayɛ pyɛ e ji hɛ, sede ba gangas batîn cɔ́gɔt e rehwot.

⁶Ba cɛgɛt mwa cɔ́gɔt na tyém tanga bamos, cɔ́gɔt o de ba tsep, ba tɔrɔ mɛ duk o.

⁷Ba dak kya e duk re a hwo fongol, ba gangas kwɔ̂n sangal mō, ba tɛ̀ hɛ ligis.

⁸Yɛn a ye e neyey mɛn, “Wot wey na yɛn hywiri!” Ko yɛn a rangas mwa nekwɔn de ba re a hwo ɛ fongol e vwel o.

⁹Vit a pyɛ de ye dura, hwà sé tanga wot, vit a zarap mo de a tɛt ɛ, ko vit a hwak e ji mot de a tɔk jeng yɛnɛ̂ pyɛ́ yemo.

¹⁰À Dagwi, bemât repugu mō bê byɛs o vɔk e yɛ̌ jeng arɛt? Yɛn ê tabas a reza mō nengyas e nesheneshey a?

¹¹Yaga sɛ́ de hwà gunung vwɔ mō ɛ? Hwo tumal hwo paa bayis zɔng wɛt!

¹²À Dagwi, hwà sé gbɔng gwɔ̀m mot yi e pɛrɛ mo, hwà ga di wɛng e jey mwa.

¹³E hwo de hwà gas gworep na reto mō, hwà bunut batô bètagbɔk ngyāma nshi.

¹⁴E hwo de hwà tuyu batô gwalwel, ko hwà nɔ̂ng ngyāma gwɛ pyɛ̂ re.

¹⁵E hwo de hwà tɛ̀ lel nshi na nerɔt be nunus, hwà tɛ̀ bègwɔrɔt be ye jɔng.

¹⁶Nagwi na sé nemo, naturuk ano arɔng, e hwo de hwà tɛ̀ pwɛl na gwi.

¹⁷E hwo de hwà gas neyɛnɛ̂ bavwêl jey, ko hwà tɛ̀ nǎhwos na nazɛng.

¹⁸À Dagwi Darwey, bare ngan: vê repugu mō be byɛs o, betɔn vemo be tabas a reza mō nengyas.

¹⁹Hwà tɛ̀ yey na bemat mō, hwo kwon nɔ̂ng ngyāma yemo vɛ wɛt. Wot a sé sɔ zot tik na be tak a wot reyɔm gbak-gbak wɛt!

²⁰Bàre na sira de hwà wuna na wot! Vê sogô nehywɛ be lɛsɛ hɛn e kanɛ nekwɔn hywiinîn vwel o.

²¹Hwo tik vemo de be midra hɛn be wok rekyen wɛt, ko tik bepɛng na vemo de vit à hɛn na mwât sɛlɛ be somo hwo!

²²Sogo, à Dagwi, dul to mō! Bare wɔgɔ, bemat de be kyɛ́ ɛn hwo be shɛgɛsh hwo mwa wosho.

²³Hwo ye bam a shisâ bemât repugu mō wɛt, rewɔng mɛn re gwɛsɛ hɛ kayɛ jeng.