Read berom Lɛlɛ 75 Bible Online

Lɛlɛ 75 - berom bible

Lɛlɛ 75

¹Lwɛlɛ̂ Asaf. Bē ra gwɛ na fwɔ lwɛlɛ “Hwo wey mɛ wɛt.” Gwá sè e vwɔ̂ mwât kyé na lɛlɛ. Wot a feng a hwo, à Dagwi, wot a feng, yaga hwà sé bagat na wot! Bemat e kagwa be ha e ra pyɛ̂ bes de hwà ga ra.

²Hwà ye, “Ma ga yɛrɛ jeng de mê gas shɔt e tē.

³Jeng de jey ye digis, ko bemat de ba sé sangal e ji yɛ be vow, me, me kaba retîs yɛ na re tumal gak.

⁴Me yâng vemo de be dak kaa, ‘Tik in dak kaa!’ Ko me yâng vê ragas neves, ‘Tik in tôs bato yaga gap min.

⁵Yin tos bato min kɛ yin paa kwas wɛt!’ ”

⁶Vit a mwat hwak de e nusu yi e rwa rak kɛ wo ta, kɛ yi e hêy gbingiring de e tɔk tɛ̀ mwat a sè gbɔng o.

⁷A sé e Dagwi de e ra shɔt, e gwɛ̌ a bemat behak nerey, ko e tɛ̄t nerey behak.

⁸Dagwi Darwey a vɔk keshi sɔ e vwɔ mɛ, ka sila na nshî anap nane de ne tē puu, nemo de ba ga puru. E nɔ̂ng kawɛ mwat vwes e jey nshi mo, e tɛ̀ ɛn, be vo nɛ pere wɔ ye fip.

⁹Ko me à me, mê ha tomông Dagwi wo Yakɔp neshey gbak-gbak, mê ra a yɛ lwɛlɛ na yom.

¹⁰Ê wey na kaà bemat beves, ko ê nɔ̂ng bemat berat reto.