Read berom Lɛlɛ 76 Bible Online

Lɛlɛ 76 - berom bible

Lɛlɛ 76

¹Lwɛlɛ̂ Asaf. Bē ra gwɛ na yōm. Gwá sè e vwɔ̂ mwât kyé na lɛlɛ Ba tɔk Dagwi tsɛng-tsɛng e bak vwêl Yuda, a vɔk za e sevwêl Israyɛl.

²Buk mɛ gwa sé e Yɛrusalɛm, kwɔ̂n sangâl mɛ e Raku Siyɔn.

³E hwomo de a kwɔrɔs pyɛ̂ comô bemât repugu, yɛ̄ à ket de ba tɛsɛ e kya, na beruga tanga bewal.

⁴À Dagwi, nedyɛt nerat ne gwɔrɔ hwo, jeng de hwà sé toyo yi e beraku, kwɔn de hwà di wɛng e ra vê repugu mō, hwó bɔrɔs bɔrɔ̂s gbɔng mwat.

⁵Ba hala bemât como vê yey ting vɔ sǎn, yɛn a ga man na reku, vit a gwining e ji yɛn de a kyɛm a ye ngyaram.

⁶À Dagwi wo Yakɔp, jeng de hwà shìra bedwa tanga besuga, ko ba gabsa bavin o.

⁷À Dagwi, mwa bemat be wok bengyip mō. Wa ê tɔk tumal e nuyel mō e jeng shom mō ɛ?

⁸Hwà ha yi e lagwi shɔt de hwà yɛrɛ. Bemât jey ba tɛ̀ bengyip, ba saa yuu.

⁹Jeng de hwà sogo, hwà yɛrɛ shɔt, na hwo sey mɛ mwa vemo de ba tak a yɛn.

¹⁰Shôm bemat ye ka tɛ̀ be gwɛ̌ somo hwo, ko vemo de ba hywit ɛn yi e shom o, ba sé sede kpin de hwó tɔrɔ hwo mɛ.[29]

¹¹Vo in nu wɔgɔ, yin ê nɔ̂ng Dagwi Darwey, Dagwi min nenɔrɔ, ko sila hin vonu mo. Mwa hin de yin a gwɔrɔ hɛ, vey in na nenɔrɔ min na yɛ, yɛ womo de be wok bengyip mɛ.

¹²E tɛt nerêy bemât nuyel de be dak kaa, ko e tɛ̀ bengyip e neyey begbɔng begwɔ̀m jey.