Read berom Lɛlɛ 77 Bible Online

Lɛlɛ 77 - berom bible

Lɛlɛ 77

¹Lwɛlɛ̂ Asaf de a ra a Yɛdutun.[30] Gwá sè e vwɔ̂ mwât kyé na lɛlɛ. Ma tosho a Dagwi na gbɔng fwɔ, ma tosho a yɛ na gbɔng fwɔ, na a bin wok me.

²E jeng reyɔm, me jāma Darwey. Naturuk me sǎ na vɔ hom e nára vɔk na yɛ, ko mê sey wɔrɔk mwat hwak wɛt.

³Me bare na Dagwi, ko me rus, e tɛ̀ me gbɛrɛk.

⁴E ro a bayis hom na nevwa, me yel e bɔrɔk, me tɔk ha wɛt.

⁵Báre hom ha toyo vɔk e jeng raane, vɔk e neshey de na ga kana kwey.

⁶Nabwalak me bare na lɛlɛ hom, me tɔrɔng e ji yey hom, ko me rangâl to hom ngan:

⁷“Darwey ê ye zak a hot gbak-gbak a? A rɔda to dura a wot nerat mɛ a?

⁸A ga tik nà tɛ̀ yey na wot nesheneshey a? Ê sila nu de a ga vo a wot gbak-gbak wɛt arɛt?

⁹Dagwi a ga ye bam à wok nemwishish a? E ji shom mɛ, a ga kyɛ́ ɛ nà tosho reyɔm mot a?”

¹⁰Ko ma ye, “Pyɛ de ye lashe a me yey yɛ̀ a: Dagwi De A Dal Na Reto Mwa e to sɛlɛ hot na vwɔ̂ gap mɛ wɛt.”

¹¹À Dagwi Darwey, me bare na tomong mō, ey, na pyɛ̂ bes mō yê raane.

¹²Me tɔrɔng e ra gbɔng pyɛ́ de hwà ra jijining.

¹³À Dagwi, begwong mō ba sé berat. Vit a ci de ya sé sede hwo.

¹⁴Hwà sé Dagwi de hwó ra pyɛ̂ bes, hwó tɛ̀ yére bemât jey be tɔk reto mō.

¹⁵Hwà viri bemat mō, yére Yakɔp na Yɔsɛf yi na reto mō.

¹⁶À Dagwi, jeng de gworep gwa di o, gwa tɛ̀ bengyip, ey, gwa tɛ̀ bengyip, gwa vow vɔk e tîs gwɛ.

¹⁷Rwak wa jɛrɛk yi e larwak, gbara wa taksal, ko nedɛbɛt mō na tabas e kagwa sede ket.

¹⁸Ba wok lumla mō sede bol kyɛkyɛ̂ bedwa, nedɛbɛt na tɛ̀ negbey e ra jey mwa, jey ya dikta ko ya digis.

¹⁹Gwong mō gwa kwey e ji gworep, hwà yɛrɛ gwong e ji nshi dɛ̀mbɛl, ko ba ka di tas bol mō wɛt.

²⁰Hwà kyè na bemat mō sede lwêk vyēl e kyè na kwara mɛ, ko hwà kasa Mose tanga Aharon na be se vê nuyel mɛn.