Read berom Lɛlɛ 78 Bible Online

Lɛlɛ 78 - berom bible

Lɛlɛ 78

¹Lwɛlɛ̂ Asaf de gwo rɔgɔm. À bemat hom, wok in basa hom, wet in betong na ha hom!

²Ma rɔda ha na cīnat neha, ma rɔda kulu pyɛ́ de ya sé e lɛrɛ yimo raane.

³Ya sé pyɛ́ de wot a wok, wot a tɔk yɛ, yaga bedabeda mot ba ha a wot yɛ,

⁴ko wot ê lɛrɛ a nèy mot yɛ wɛt. Wot ê ha a nezamang de ne kyè vey retô Dagwi Darwey, wot ê ha a nɛ tomong de ba vey be somo hɛ, tanga pyɛ̂ bes de a ra.

⁵Dagwi à kana basa a BeIsrayɛl basa mɛ, à nɔ̂ng yerê Yakɔp badu. Ko à nɔ̂ng bedabeda mot nu, be basa a nèy mɛn.

⁶Yi ano, nezamang de ne kyè vey, nèy de bê tɔs nê tɔk pyɛ́ mo, ko nê to ba basa a nèy mɛn.

⁷Ano kwong, yɛn ê sɛt yey mɛn e ra Dagwi, bê gyeng badu mɛ, ko bê ye bam a gbɔng tomong mɛ wɛt.

⁸Yɛn ê sè sede bedabeda mɛn wɛt, vemo de bá sè gbàrak bá sogso nehywɛ, bá tumal ting wɛt, ko bá kyɛ́ ɛn bak Dagwi.

⁹Bemât Ɛfrayim ba vɔk bemât tabâs begbang, ko tûk como ba tele.

¹⁰Yɛn a kwɔrɔ sira de Dagwi a wuna na yɛn, ba kyɛ́ ɛn nà raa basa mɛ,

¹¹ba ye bam a tomong de a ra, na pyɛ̂ bes de a dura a yɛn.

¹²E sevwêl Misra, e bak vwêl Zowan, Dagwi a ra pyɛ̂ bes e dî bedabeda mɛn:

¹³A gas gworep, a kwey ɛ na yɛn, a tɛ̀ nshi mo na tumal sede vwarâ duk.

¹⁴Nagwi a tɛ̀ rele re kyè e nuyel mɛn, na a dura a yɛn mɛ gwong, ko naturuk a ra fwom na negbey kya.

¹⁵A mɔbɔs bègbɔng beta e hey, ko a nɔng ɛn nshî sɔ polos sede yi e berep.

¹⁶A tɛ̀ nerɔt ne nusu yi e gwofwa, nshi na tele ɛ̀ sede ne bègwɔrɔt.

¹⁷Ko e hêy gbingiring, yɛn a re nuyel na ragas a Dagwi banɛn, yɛn a sogo a Yɛ De A Dal Na Reto Mwa nehywɛ.

¹⁸Jeng de yɛn a simo pyɛ̂ re de ya ta a yɛn, yɛn a mara Dagwi na negaren.

¹⁹Yɛn a ragas hɛ, ba tē, “Dagwi ê tɔk nɔng ot pyɛ́ e hey arɛt?

²⁰Mwin, á rusu gwofwa, ko nshi na tele sede ne nerɔt. Ko ê to kyɛm a nɔ̂ng bemat mɛ pyɛ̂ re kɛ banama bɛ̀?”

²¹Sede Dagwi Darwey a wok, a tɛ̀ shom ding-ding na yerê Yakɔp, a tɛ̀ kya e ra BeIsrayɛl,

²²yaga yɛn a tɛ̀ gap e ra yɛ wɛt, ba tó yey e ra reto de a vɔk na a sey ɛn.

²³Mwa ano, a nɔ̂ng larwak nu, a wunta ri duk lagwi,

²⁴ko a rop a yɛn pyɛ̂ yéneng, yemo de ba yila yɛ à Mana.

²⁵Dagwi a tomo a yɛn na yɛ̄ pyak, ko kawɛ mɛn a re pyɛ̂ rê betom-lagwi yemo mo.

²⁶E bama mo, a tɛ̀ gul rwa rak yi e lagwi, a gang gûl rwa batin na reto mɛ.

²⁷A rop a yɛn banama sede fongol, benon ba gyirik pyak sede bazɛ̂k rep.

²⁸A tɛ̀ vɛ̀ be gyirik e kwɔ̂n yê ngyɔk mɛn, na gwɔrɔ mwa bûk sangal mɛn.

²⁹Bemat o ba re ba siris. Dagwi a ga nɔng ɛn pyɛ de yɛn a simo mo.

³⁰Ko cwey banama ya rɔngɔl a yɛn. Yɛn á sè rɔɔ tangal pyɛ́ mo,

³¹ko Dagwi a pere sogo shom e ra yɛn. A wey na vê gap e ji mɛn, ba tɛt nepyak bewên BeIsrayɛl.

³²Ko bwang mɛn ba re nuyel na ragas banɛn. Mwa ano de Dagwi a ra pyɛ̂ bes, ko ba ka tɛ̀ gap mɛn e ra yɛ wɛt.

³³Ano, a tɛ̀ nepɔlɔ mɛn nà tala hɛn sede nesong, a tɛ̀ reyɔm re vo neshey mɛn fút.

³⁴Kayɛ jeng de Dagwi a wey na behak mɛn, bwang mɛn ba hwo jama hɛ, ko ba to toyo wɔ na yɛ.

³⁵Yɛn a bare, Dagwi a sé a yɛn kwɔ̂n dal, Yɛ De A Dal Na Reto Mwa a sey ɛn.

³⁶Mwa ano, yɛn a dak a yɛ rwak nu, yɛn a vɛ́sɛ a yɛ bɔs.

³⁷Yɛn á sè e bak mɛ wɛt, bá gyeng sira de a wuna na yɛn wɛt.

³⁸Ko Dagwi a tosho reyɔm mɛn, a hala buru mɛn, a wey na yɛn wɛt. A yɛksɛl shom mɛ e jeng e jeng, a tik yɛ, ye hwo mwa wɛt.

³⁹A bare, yɛn a sé bemasi zɔng, sede gul de gwa ga kwey, gwa ga kyè, vit à toyo.

⁴⁰Jeng de bá sè e hey, ba sogo nehywɛ mɛ zang pyak, ba tɛ̀ ɛ a lashe yey mɛ.

⁴¹Ba sǎ e de masâ Dagwi, ko ba ragas hɛ, mwa ano de a sé Dagwi mɛn.

⁴²Yɛn a ye bam na reto mɛ, de a viri hɛn mɛ yi e vwɔ̂ vê repugu mɛn.

⁴³Yɛn a ye bam na jeng de a ra pyɛ̂ durâ reto mɛ e Misra, na pyɛ̂ bes e bak vwêl Zowan:

⁴⁴A tɛ̀ nshî nerɔt mɛn ne tɛ́ ɛn nemi, ko BeMisra ba tɔk sɔ nɛ wɛt.

⁴⁵A tɛ̀ cíng de ya tak a yɛn, na bebót de ba lashe pyɛ́ mɛn.

⁴⁶A tɛ̀ bekǔt tangapurus be re pyɛ̂ cāp mɛn, rawal wa lashe pyɛ̂ hiri mɛn.

⁴⁷A wey na batîn anap mɛn na fwala, na batîn regwi mɛn na neyɔɔtɔt.

⁴⁸A wey na berɔndɔng mɛn na fwala, na karâ vyēl mɛn na gbara.

⁴⁹A tɛ̀ shom mɛ ye yē puu, ye bɔgɔs e ra yɛn, a tɛ̀ be yel e ji reyɔm pep, a tomo regyɛng betom-lagwi vê weres e ra yɛn.

⁵⁰A yɛklɛ shom mɛ wɛt, a to ka dul ɛn yi e reku wɛt, a wey na yɛn na tumbang.

⁵¹E ji nelɔ BeMisra, yerê Ham, a mɔrɔ kahɛ hwey wen hê mɛsɛng o, nèy de ba tɔs e ji newen mɛn.

⁵²E bama mo, a pat bemat mɛ yi e Misra, a kyè na yɛn e hey sede kwarâ vyēl.

⁵³A kyè na yɛn tyang, vit a bengyip, ko bemât repugu mɛn — gworep gwa wey na yɛn.

⁵⁴Dagwi a kyè na yɛn vɔk e vwel de a tik jaram yaga yɛ, vɔk e raku de a ga re na como.

⁵⁵A raa na rô yére bemât Kanaan o, a gas a yére BeIsrayɛl sevwel o pyɛ̂ nedanelɔ, ko a nɔng ɛn nelɔ mɛn.

⁵⁶Mwa ano, yɛn a sogo nehywɛ Dagwi De A Dal Na Reto Mwa, ko ba kyɛ́ ɛn nà gyeng badu mɛ.

⁵⁷Yɛn a hala bak mɛ tyɛng sede bedabeda mɛn. Ba ye waa a hɛ, bá sè sede gbang de wa dûn ye net.

⁵⁸Ba tɛ̀ ɛ, a ra shom yaga nekwɔn cī mɛn, a bɛɛ hɛn ves, yaga pyɛ̂ sekwit de ba yong.

⁵⁹Dagwi a di ano, ko a tɛ̀ shom, a ye zakzak a BeIsrayɛl.

⁶⁰A hala buk mɛ de gwa sè e Shilo, buk de a kana sangal e gwɛ e ji bemat.

⁶¹A tik bemât repugu be kyè na Kundung Wuna-na-Sira de gwa dura reto, na gbɔng nerey, na nerat mɛ.

⁶²A ra shom na bemat mɛ, ko a tik vê repugu mɛn be mɔbɔs hɛn.

⁶³Como ya wey na bewen mɛn, behwóng mɛn ba bidɛ bewên weneng.

⁶⁴Ba mɔbɔs bepiris na bewal, ko beha mɛn ba tɔk ra lwɛlɛ̂ sesin wɛt.

⁶⁵E tala mo, Darwey a sogo sede mwat de a sene yi e de nevwa, sede mwât gap de a ga yî wɔ̀t.

⁶⁶A hǎl bemât repugu mɛ e balus, a tɛ̀ ɛn, be tē det na rekyen neshey gbak-gbak.

⁶⁷A kyɛ́ ɛ yerê Yɔsɛf, a tik ná yerê Ɛfrayim ye se vê nuyel wɛt.

⁶⁸Ko a kasa yerê Yuda na Raku Siyɔn, raku de a tɛ̀ yey na wɛ.

⁶⁹E hwomo, a lɔk ɛ Gbɔng Duk Re Fongol mɛ, a lɔk wɛ e tɛt o sede lagwi, tîs wɛ ha vɔk gap sede jey de a kana tɛ̀ yɛ gbak-gbak.

⁷⁰A kasa Davit na a sè sam mɛ. A jut ɛ yi e kwara,

⁷¹yi e de gyêng vyēl a vey na yɛ, na a tɛ́ ɛ lwêk bemat mɛ, BeIsrayɛl, yɛn vɛ à yerê Yakɔp.

⁷²Davit a bɛrɛng hɛn na yey rining, a tɔ̄k kyé na yɛn.