Read berom Lɛlɛ 79 Bible Online

Lɛlɛ 79 - berom bible

Lɛlɛ 79

¹Lwɛlɛ̂ Asaf. À Dagwi, yere dyuk ya ga hwo e ra vwel mō, ba ga tɛ̀ Gbɔng Duk Re Fongol mo ligis, ko ba ga tɛ̀ Yɛrusalɛm wo tɛ́ ɛ barin.

²Yɛn a tik a bejagawey bavîn besam mō, yɛn a tik a ngyāma bavîn bemat de bá sè pang na hwo.

³Yɛn a lusha nemî bemat sede nshi, nemi ná sè kagwa e Yɛrusalɛm, vit a mwat de á pɔl ɛ de ê lɛrɛ bavin o.

⁴Yére dyuk de ya gwɔrɔ hot ye tabas a wot nengyas, ye byɛs ot, ye shɛgɛsh hot.

⁵E yɛ̌ jeng, à Dagwi Darwey, de hwô hala shom mō ɛ? Shom mō ye re sede kya. Yê nàra gbak-gbak a?

⁶Tik shom mō ye doyo e ra yére dyuk de ya tɔk o wɛt, e ra vemo de be re a hwo fongol wɛt.

⁷Ba ga wey na yére Yakɔp, ba ga hala vwêl yɛ gbingiring.

⁸Hwo rɔgɔs a wot banɛ̂n bedabeda mot wɛt! Vey dey-dey, tosho reyɔm mot! Wot a ga ye waa zɔng.

⁹À Dagwi, mwât sey ot, sɛlɛ hot, ka ano wɛt, hwô bomo nerey mō! Sey ot, hala a wot banɛn mot yaga nerey mō!

¹⁰Yaga sɛ́ de yére dyuk ye tē, “Dagwi mɛn o a wɛ ɛ?” Tik na wot tanga bwang yére dyuk wot a di gwong de hwô tala yɛ, yaga ya mɔbɔs besam mō.

¹¹Wok rus bemât lɔ̂ ngyang! Hywit vemo de ba ga yɛrɛ a yɛn shɔt reku na vwɔ̂ gap mō.

¹²À Darwey, yére dyuk de ya gwɔrɔ hot ya ga woros hwo. Toyo a yɛn na woros zang taama!

¹³Ano kwong, wot bemat mō, wot a rɔda féng a hwo nesheneshey. Wot a sé sede vyēl ko hwo wɛ a lwek mot. Wot ê ha hâ somo mō yi e zamang wɔ sɛ̀ nezamang.