Read berom Lɛlɛ 80 Bible Online

Lɛlɛ 80 - berom bible

Lɛlɛ 80

¹Lwɛlɛ̂ Asaf. Bē ra gwɛ na fwɔ̂ lwɛlɛ “Bejamûk líli ve vonu.” Gwá sè e vwɔ̂ mwât kyé na lɛlɛ. Wet betong, à lwêk BeIsrayɛl, hwo de hwó gyeng yerê Yɔsɛf sede kwarâ vyēl! Hwo de hwà sé sangal e gwofwa negwɔm mō e ra bekɛrup, dura to mō e ji nedyɛt nerey mō!

²E bayîs yére Ɛfrayim, na Bɛnyamin, tanga Manase, dura gbɔng reto mō! Hwo vey sey ot!

³À Dagwi, to turu hot, bɛrɛng hot na nerat! Ano, hwà ga sɛlɛ hot.

⁴À Dagwi Darwey, Dagwi Dâ Jey Mwa, vɔk e yɛ̌ jeng de hwô ra shom, de hwô kyɛ́ o nà sey won bemat mō arɛt?

⁵Hwà ga nɔng ot nemwishil sede pyɛ̂ re, hwà ga tɛ̀, wot a ngap nɛ vit à yɛnɛ.

⁶Hwà tɛ̀ bemât vwara mot be ra repugu na bemɛn, na be sey ɛ sevwel mot, bemât repugu mot be shɛgɛsh hot.

⁷À Dagwi Dâ Jey Mwa, to turu hot, bɛrɛng hot na nerat! Ano, hwà ga sɛlɛ hot.

⁸Retîn anap rá sè e Misra. Hwà cing rɛ, hwà ro yére cak, ko hwà tus rɛ e kwɔn mɛn.

⁹Hwà yong vwel yaga tîn anap o, ha tɛ̀ berinis ciwil, ko ha ye ship a mwa vwel o.

¹⁰Necam hɛ na kyiri beraku, na kyiri batîn sida barey o na nelang hɛ,

¹¹ha nára nelang hɛ wɔ wul Gworep Tē e rwa ta, nà wɔ sɛ̀ Gwɔrɔt Ɛifaratɛs e rwa bato.

¹²Yaga sɛ́ de hwà gangas beta de hwà ta mɛ hɛ ɛ? Di, kawɛ mwat de a sé kwey ê vos nèy tîn anap o zɔng.

¹³Bezà hey bê buruk hɛ, ko ngyāma yê vɛ mɛ pyɛ̂ re.

¹⁴À Dagwi Dâ Jey Mwa, to toyo vey na wot! Bɛrɛng yi e hwomo e lagwi, na hwo di. Rá naka na tîn anap o,

¹⁵hemo de hwà tus na vwɔ mō, hɛ à bwot tîn anap de hwà ga tɛ̀ he vɔk gap.

¹⁶Vê repugu ba ga tow hɛ, ba dak ɛ kya. Pat a yɛn bayis, ko bê ye bit!

¹⁷Tɛ̀ vwɔ mō e ra mwat de a sé e vwɔ yege mō, na hwo dul ɛ, mwat de hwà ga tɛ̀, a vɔk gap.

¹⁸Wot ê to toyo rè bama yi na hwo wɛt. Turu hot, ko wot a rɔda re a hwo fongol.

¹⁹À Dagwi Darwey, Dagwi Dâ Jey Mwa, to turu hot, bɛrɛng hot na nerat! Ano, hwà ga sɛlɛ hot.