Read berom Lɛlɛ 81 Bible Online

Lɛlɛ 81 - berom bible

Lɛlɛ 81

¹Lwɛlɛ̂ Asaf. Bē ra gwɛ na yôm bemât Gat.[31] Gwá sè e vwɔ̂ mwât kyé na lɛlɛ. Rá in a Dagwi biibi, yɛ wɛ de a nɔng ot gap! Mók in a Dagwi wo Yakɔp lwɛlɛ!

²Jut in lwɛlɛ mo, dak in bing, rɔgɔm hin lɛlɛ na yôm kwo tanga yôm shǐ.

³Pɛl in durum e nusû pwɛl pwas, na jeng de gwa ga kat e tuk nzem mot.

⁴Hemo ha sé redu yaga BeIsrayɛl, ha sé nu de Dagwi wo Yakɔp a vo.

⁵A kana nɔ̂ng yerê Yɔsɛf redu mo jeng de a sogo e ra BeMisra. Ma wok mwat hwak á sè ha e lem de ma tɔ́k me mɛ wɛt.

⁶A ye, “Ma ga lol a yin pyɛ̂ nedirik, ma ga jut sháp yi e vɔ min.

⁷E ji reyɔm, yin a yila me, ko ma sey in, ma hanat a yin yi e kwɔ̂n lɛrɛ hom e balê rwak. E bama mo, ma mara hin e lwêl nshî Mɛriba.

⁸Wok in, à bemat hom, jeng de ma sé hwɔtɔ a yin betong. À yin BeIsrayɛl, ka yin a yang wet betong na me zɔng!

⁹Yin vɔk pyɛ sekwit cak kɛ yin sap ci arɔng wɛt.

¹⁰E me wɛ à Dagwi Darwey, Dagwi min. Ma nusu na yin yi e sevwêl Misra. Wunta hin nenu min hang, ko mê sila nɛ, sede gwonon de gwo nɔng nèy gwɛ pyɛ́.

¹¹“Ko bemat hom ba wet betong na me wɛt, BeIsrayɛl ba simo pyɛ cak ye man ɛn na me wɛt.

¹²Ano, ma hala hɛn na negbarak yey mɛn, na be ra pyɛ de yey mɛn ye simo.

¹³“À yin bemat hom, ka yin a yang wet betong na me, à BeIsrayɛl, ka yin a raa begwong hom,

¹⁴ka ma yang tɛt bemât repugu min e ji jeng, ma yang doyo e ra vemo de be bɛɛ hin ves!

¹⁵Vemo de be kyɛ́ ɛn me ba yang vow, be tē guduruk, gwomwɛn gwa yang tala hɛ gbak-gbak.

¹⁶Ko ma yang nɔng in pyɛ̂ re de ya dal na nerat, tanga shok de yê vey a yin.”