Read berom Lɛlɛ 83 Bible Online

Lɛlɛ 83 - berom bible

Lɛlɛ 83

¹Lwɛlɛ̂ Asaf. À Dagwi, hwo man nu, hwo wey ɛ yuu wɛt! Hwo ye jaram wɛt!

²Di, bemât repugu mō ba ga doyo e ra hwo, vemo de be kyɛ́ ɛn hwo ba ga sogo a hwo nehywɛ.

³Bé yong begwông repugu wɔ̀ sɛ̀ mɛ bemat mō, be wuna nu mɛn, na be yong begwong beves e ra vemo de ba sé pyɛ̂ yey mō.

⁴Yɛn e tē, “Tik wot a wey na BeIsrayɛl hywiri, ko bê to wok reza mɛn wɛt!”

⁵Yɛn e ra badu, ko myak a hɛn ba simo be wuna to e ra hwo.

⁶Yɛn vɛ a BeƐdɔm na BeIshmayɛl, BeMowap na BeHagar,

⁷BeGebal, BeAmɔn, BeAmalɛk, BeFilisti, tanga bemât repomô Tur.

⁸BeSirya ba wuna hɛn tanga yɛn, na be gwɛ̌ a BeAmɔn na BeMowap, vɛ a yerê Lɔt, gap.

⁹À Dagwi, rá a yɛn sede hwà ra na BeMidyan, sede hwà ra na Sisera tanga Yabin e Rɔt Kishɔn.

¹⁰Ba wey na yɛn e Ɛn-Dɔr, ba tik bavin mɛn be bɔsɔ e hey.

¹¹Rá a begbɔng bemat mɛn sede bá ra a Ɔrɛp tanga Zeep, sede bá ra a Zeba na Zalmuna.

¹²Yɛn mwa ba ye, “Tik na wot a sey ɛ vwel de ha sé hê Dagwi, na he tɛ́ ɛ mot.”

¹³À Dagwi hom, tɛ̀ ɛn be tɛ́ ɛn sede berang de wula wa rung, sede byɛmɛ de ye raa gul.

¹⁴Sè a yɛn sede kya de he re rehwot, sede nebelem kya de ne lolo e beraku.

¹⁵Ró ɛn na gwogul rwak mō, tɛ̀ ɛn, be ye lot na sombabos mō!

¹⁶À Dagwi Darwey, tik be tē det na rekyen, na be hwo jāma hwo.

¹⁷Tik ɛn be sɔ rekyen, be sangal e de tē lot neshey gbak-gbak, tik be wey e ji rekyen.

¹⁸Tik yɛn a tɔk, hwo nju mo zɔng de reza mō à Dagwi Darwey, hwo nju mo à Dagwi De A Dal Na Reto Mwa e jey.