Read berom Lɛlɛ 84 Bible Online

Lɛlɛ 84 - berom bible

Lɛlɛ 84

¹Lwɛlɛ yaga ruhûp Kora de bē ra gwɛ na yôm bemât Gat.[32] Gwá sè e vwɔ̂ mwât kyé na lɛlɛ. À Dagwi Darwey Dâ Jey Mwa, ma tɛ̀ yey na kwɔ̂n sangal mō ding-ding!

²Me wok cwey yel e ji nelalâ duk re a hwo fongol tyɔng wɛt. À Dagwi wo neken, ma sé ra a hwo biibi na yey pyɛng sizɔng.

³À Dagwi Darwey, Dâ Jey Mwa, à Dagwi hom na gbɔng gwɔ̀m hom, nenon ná ka sɛ̀ nelɔ nɛ e nekwɔn rangas a hwo yas, beywat be lɔkɔs ɛ berangɛ mɛn, be kwɛk ɛ nèy mɛn.

⁴Vê wɛng a vemo de ba sé sangal e ji lɔ mō, yɛn é tɔk somo hwo kayɛ jeng!

⁵Vê wɛng a vemo de ba tɛ̀ gap mɛn e ra hwo, vemo de ba tɛ̀ e yey mɛn, bê wɔ e duk re a hwo fongol.

⁶Ko jeng de yɛn a sé kwey e nɛk de wa sé hwogot, lel nshi na hwo tē gbuk, ko rwak naswigi wó se rop, wó tɛ̀ kayɛ pyɛ ye turuk, kwɔn o he sè rat e bɛrɛng.[33]

⁷Sede yɛn a sé kyè, gap mɛn ha sé gwɛsɛ hɛ, sɛ̌ yɛn a wul e nuyêl Dagwi e Raku Siyɔn.

⁸À Dagwi Darwey, Dagwi Dâ Jey Mwa, wok won hom, wet betong mō, à Dagwi wo Yakɔp!

⁹À Dagwi, di gbɔng gwɔ̀m mot de a sé ruga mot. Vɔk womo de hwà ga kasa na yey pyɛng!

¹⁰À Dagwi, tuk hining e ji duk re a hwo fongol, ha dal nepɔlɔ gu rining e kagwa. Ma dal na simo, me tumal e rwi lɔ mō, de mê sangal e nelɔ bemat beves.

¹¹Mwin, Dagwi Darwey a sé sede gwi, a sé sede ruga arɔng. E nɔng ot nerat na nerey, vit a pyɛ cak ryat de e ro mɛ a vemo de ba sila gyat.

¹²À Dagwi Darwey, Dâ Jey Mwa, wo wɛng a womo de e tɛ̀ gap e ra hwo!