Read berom Lɛlɛ 85 Bible Online

Lɛlɛ 85 - berom bible

Lɛlɛ 85

¹Lwɛlɛ yaga ruhûp Kora. Gwá sè e vwɔ̂ mwât kyé na lɛlɛ. À Dagwi Darwey, hwà ga dura nerat na vwel de ha sé mō, hwà ga to suna yerê Yakɔp.

²Hwà ga hala burû bemat mō, hwà ga fugut a yɛn banɛn mɛn mwa.

³Hwà tik shom mō, hwà yɛklɛ shom mō de yá tē puu.

⁴To suna hot, à Dagwi, mwât sey ot, tik râ shom na wot!

⁵Hwà rɔda ra shom na wot gbak-gbak arɛt? Shom mō yê nàra wɔ sɛ̀ nezamang a?

⁶To turu hot, yaga na wot, bemat mō, wot a vɔk yey pyɛng na hwo.

⁷À Dagwi Darwey, dura a wot nerat mō, ko hwo vey sey ot!

⁸Ma sé wet betong na pyɛ de Dagwi Darwey a sé ha. E ha hâ sangâl netyang yaga bemat mɛ, yaga vemo de ba sé pang na yɛ, ko be to doyo e netɔn mɛn wɛt.

⁹Mwin, a sé e yong ɛ, na a sey vemo de be sap ɛ, na gbɔng nerey mɛ ne se e vwel mot.

¹⁰Dagwi de a tɛ̀ yey na BeIsrayɛl, tanga BeIsrayɛl de ba sé pang na yɛ bê man. BeIsrayɛl de be gyeng ha mɛ ba rɔda sɛ̀ netyang de e nɔng vemo de a tɛ̀ yey na yɛn.

¹¹BeIsrayɛl de ba sé pang na Dagwi ba rɔda nára vɔ mɛn yi e jey, ko Dagwi de e ye waa a BeIsrayɛl ko tyɔng wɛt a rɔda bɛrɛng yi e lagwi.

¹²Ey, Dagwi Darwey ê nɔng ot pyɛ́ de ya sé ryat, ko wot ê sɛ̀ bwal rwat e vwel mot.

¹³Dagwi a sé cik, negwɔn a nane de ne kyè e nuyel mɛ sede mwât mok, ko ne yong gwong yaga yɛ.