Read berom Lɛlɛ 86 Bible Online

Lɛlɛ 86 - berom bible

Lɛlɛ 86

¹Wôn Davit À Dagwi Darwey, wet betong na me, hanat a me, yaga ma sé pwɛng, me simo sɛlɛ.

²Gyeng neken hom, yaga ma sé ra nesa na hwo! Ma sé sam mō, ma tɛ̀ gap e ra hwo. À Dagwi hom, sey me!

³Me tosho a hwo mwa wosho, à Darwey, wok nemwishish hom!

⁴Ma sé nɔng o yey hom mwa, tɛ̀ yey hom ye pɛngɛ, yaga ma sé sam mō.

⁵À Darwey, hwà sé wo nerat, hwó halsa a wot; hwà tɛ̀ yey ding-ding na mwa vemo de be yila e ra hwo.

⁶À Dagwi Darwey, wet betong na won hom, wok dâk gabɔk hom!

⁷Jeng de reyɔm re sɛ̀ me, me yila hwo, yaga ma tɔk, hwô hanat a me.

⁸À Darwey, vit a hwak sede hwo e ji cī, vit a jining de yê tɔk ra pyɛ́ de hwó ra.

⁹Hwà yong mwa yére bemât jey. Ya rɔda vey, ye re a hwo fongol, na ye nɔng o nerey, à Darwey.

¹⁰Hwà vɔk reto, hwó ra pyɛ̂ langat, hwo wɛ hwà sé Dagwi, hwo nju mo zɔng!

¹¹À Dagwi Darwey, dura a me begwong mō, ko mê gyeng vɛ na yey hom mwa. Tik nehywɛ hom mwa ne se, me sap o!

¹²Mê feng a hwo na yey hom mwa, à Darwey Dagwi hom. Ma rɔda nɔng o nerey kayɛ jeng,

¹³yaga hwà tɛ̀ yey na me ding-ding, hwà sey me yi e nû reku.

¹⁴À Dagwi, bemat de be paa kwas ba ga sogo e ra me, regyɛng bemat de be paa neves be jama neken hom. Yɛn a jut o, hwà sé pyɛ cak na yɛn wɛt.

¹⁵Ko hwo, à Darwey, hwà sé Dagwi wo toshô reyɔm, wo nerat. Hwó ra shom ziri wɛt, hwó dura a bemat nerat mō ding-ding, hwa sé wo tsak o arɔng.

¹⁶Ma sé sam mō, ma sé hwêy hining e ji bemât fwom mō. Doyo vey na me, tosho reyɔm hom! Nɔng me gap, sey me!

¹⁷À Dagwi Darwey, dura a me, hwó simo me. Ano, jeng de vê repugu hom ba di gwong de hwà ga sɛlɛ me, hwà ga wɔrɔk me, ko bê wok rekyen.