Read berom Lɛlɛ 88 Bible Online

Lɛlɛ 88 - berom bible

Lɛlɛ 88

¹Lwɛlɛ̂ Heman WoƐzra de gwo rɔgɔm. Gwá sè yaga ruhûp Kora. Bē ra gwɛ yɔɔm.[34] Gwá sè e vwɔ̂ mwât kyé na lɛlɛ. À Dagwi Darwey, Dagwi, mwât sey me, nagwi na naturuk me tosho a hwo.

²Wok won hom, wet betong na dâk gabɔk hom!

³Reyɔm pyak ra ga hwo e ra me, ma sé e nû reku.

⁴Bé bara me e ji bemat de be kyè wɔ ku, gap hom ha ga tala hɛ.

⁵Ma sé sede mwat de ba ga mɔrɔ e como, ma sé sede gwining e ji bavin e gwovɔng gwining o. Hwó to bare na yɛn wɛt, hwó to sɛlɛ hɛn wɛt.

⁶Hwà ga werek me e kwɔ̂n bevuvwel, e ji kwɔn de ha dal sé mwangalang.

⁷Shom mō ye raye me, ye tɛ́s me sede bagung nshi.

⁸Hwà ga tɛ̀ besa hom be ye jaram à me, ma ga tɛ́ me pyɛ byɛm-byɛm na yɛn. Ba ga varas me, vit a gwong de mê hywit me.

⁹Bayis hom ba ga tɛ́ ɛn hywiinin yaga reyɔm. À Dagwi Darwey, kahɛ tuk me yila hwo, me nára vɔ hom vey na hwo.

¹⁰Hwô ra pyɛ̂ bes yaga vemo de ba ga kushu a? Bevuvwel bê sogo, na be somo hwo a?

¹¹Be ha rehâ tɛ̂ yey mō e sak a? Be remo hâ tsak o mō e kwɔ̂n bevuvwel a?

¹²Be tɔk bɛrɛng pyɛ̂ bes mō e kwɔ̂n mwangalang hane a? Be ha rehâ sɛlɛ mō e kwɔ̂n vemo de ba ga ye bam a hɛn a?

¹³Ko me à me, me yila hwo yaga sɛlɛ, à Dagwi Darwey, kanɛ nagasi me ra won na hwo.

¹⁴Sɛ́ ya tɛ̀, hwà ye zak a me, à Dagwi Darwey ɛ? Yaga sɛ́ de hwà lɛrɛ a me bayis mō ɛ?

¹⁵Yimo me wen me sɔ reyɔm, má sè e nû reku. Ma ga niri na mwa rezot de hwà vey a me mɛ, a ga yang me sha.

¹⁶Shom mō ya ga re me hwɛlɛng, hwosom de hwó hwosom me he wey na me.

¹⁷Mwa wosho, shom mō ye raye me e kawɛ bak.

¹⁸Hwà ga tɛ̀ besâ yey hom be ye jaram à me, a remo, sa hom à lwil zɔng.