Read berom Lɛlɛ 89 Bible Online

Lɛlɛ 89 - berom bible

Lɛlɛ 89

¹Lwɛlɛ̂ Ɛtan WoƐzra de gwo rɔgɔm. À Dagwi Darwey, mê ra lwɛlɛ̂ nerat mō kayɛ jeng. Lwɛlɛ hom gwô ha wɔ sɛ̀ nezamang: hwà sé wo tsak o.

²Ey, mê tē, “Nerat mō na rɔda nàra gbak-gbak, tsak o mō wô nàra sede lagwi.”

³Hwà ye, “Ma ga wuna me na sira tanga Davit, yɛ wɛ de ma ga kasa, ma ga vo a yɛ nu ma ye,

⁴Kayɛ jeng bê sɛ̀ gbɔng gwɔ̀m yi e yere mō, mê tɛ̀ gwofwa negwɔm mō gwo nàra wɔ sɛ̀ nezamang.”

⁵À Dagwi Darwey, e tulâ lagwi, betom-lagwi be somo pyɛ̂ bes mō, be ra lwɛlɛ̂ tsak o mō.

⁶Ey mwin, vit a hwak e lagwi de ê mara to mɛ na hwo, vit a gwining e ji bemat-lagwi de a sé sede hwo.

⁷E tulâ betom-lagwi, be vow e nuyel mō, à Dagwi, mwa yɛn de ba gwɔrɔ hwo be sap o.

⁸À Dagwi Darwey, Dagwi Dâ Jey Mwa, wa a vɔk reto sede hwo ɛ? Hwà sé wo tsak o vit a sege.

⁹Hwà vɔk reto e ra gworep. Jeng de bagung nshi be tē gundus, hwà gyong vɛ, ko ne sǎ yuu.

¹⁰Hwà mɔrɔ Rahap, gwalwel-nshi, hwà bɔrɔs gwɛ. Hwà shara vê repugu mō na vwɔ mō gwô gap.

¹¹Lagwi wa sé mwo, jey ya sé myo arɔng! Jey na pyɛ́ mwa de ya sé e ji mo, e hwo wɛ de hwà yong yɛ.

¹²Hwà tɛ̀ rwa batin na wo bato, berakû Tabor tanga Hɛrmɔn be somo hwo.

¹³Gap mō ha sé za wɛt, hwó nára vwɔ yege mō gwô wɛng.

¹⁴Tîs negwɔm mō a het ngan: hwó gas shɔt e tē, hwó gyeng badu. Hwó tɛ̀ yey na bemat mō, hwà ye waa a hɛn ko tyɔng wɛt, nemo nɛ a negwɔn negwɔm mō.

¹⁵Vê wɛng a vemo de be mok a hwo lwɛlɛ à Dagwi Darwey! Yɛn e sɛsɛm nerat yi na hwo.

¹⁶Wot e wosho e de rɛɛ na nzem, wot e kyè na to e gwi, yaga hwà gas shɔt e tē.

¹⁷Hwó nɔng ot gap de wot e dak mɛ kaa. Yaga hwà tɛ̀ yey na wot, gap mot he gwɛsɛ hɛ.

¹⁸Hwo, à Dagwi Darwey, hwà kasa a wot mwât dul ot, hwo, à Dagwi wo jɛrɛ wo BeIsrayɛl, hwà nɔng ot gbɔng gwɔ̀m.

¹⁹A raane, hwà ha na vemo de bá sè pang na hwo, hwà ha na yɛn e ji negwi-ywey, hwà ye, “Ma ga sɛlɛ sugâ como hwak, ma ga kasa bwôt mwat e ji bemat hom.

²⁰Ma ga sɛ̀ Davit, sam hom, ma ga shushu hɛ na něy de na sé jaram yaga me.

²¹Mê vɔk ɛ na vwɔ̂ gap hom, yi na reto hom mê tɛ̀ ɛ a vɔk gap.

²²“Vê repugu mɛ ba rɔda kwɛlɛng hɛ wɛt, vemo de be simo be re bol mɛ, bê sɛ̀ gwong wɛt.

²³Ma rɔda wey na vê repugu mɛ, mê mɔrɔ kawɛ de e bɛɛ hɛ ves.

²⁴Mê tɛ̀ yey na yɛ, mê se pang na yɛ, mê tɛ̀ ɛ, a vɔk gap kayɛ jeng.

²⁵Mê tɛ̀ ɛ, a re negwɔm e ra bavwel wɔ̀ ye dɔ a nerɔt tanga berep.

²⁶Davit a rɔda yang me, ‘Hwà sé da hom na Dagwi hom, hwà sé a me sede fwara, kwɔ̂n dal hom.’

²⁷Ko me ma rɔda nɔng ɛ nedanelɔ, mê tɛ̀ ɛ, a vɔk reto a dal begbɔng begwɔ̀m jey mwa.

²⁸Ma tɛ̀ yey na yɛ kayɛ jeng, ko sira de ma wuna na yɛ hê nàra.

²⁹Yere mɛ yê re negwɔm mɛ nesheneshey, gwofwa negwɔm mɛ gwô nàra gbák de lagwi wa sé.

³⁰“Ka sede yere mɛ ya kyɛ́ ɛ nà gyeng basa hom, yɛn a ra pyɛ́ de ma nɔng ɛn nu e ra yɛ wɛt,

³¹ba byɛs basa hom, ba gyenges ha hom wɛt,

³²me, ma rɔda tabak hɛn yaga banɛn mɛn, ma rɔda tɛ̀, yɛn a sɔ rezot yaga buru mɛn.

³³Ko ma rɔda tik nà tɛ̀ yey na Davit wɛt, mê tik nà sila nu de ma vo a yɛ wɛt.

³⁴“Ma rɔda kwɔrɔ sira de ma wuna na yɛ wɛt, mê sege ha de ha nusu yi e nu hom arɔng wɛt.

³⁵Gbak de ma ga sira na reza hom, ma rɔda kwɛlɛng Davit wɛt.

³⁶Yere mɛ yê re negwɔm mɛ nesheneshey, gwofwa negwɔm mɛ gwô nàra gbák de gwi gwa sé,

³⁷gbák de pwɛl gwa sé, pwɛl de gwo bɛrɛng yi e larwak, gwo nɔng nuha.”

³⁸Ko di, à Dagwi, hwà tɛ̀ shom na gbɔng gwɔ̀m de hwà kasa, hwà nɔng ɛ ma, hwà ye zak a hɛ.

³⁹Hwà kwɔrɔ sira de hwà wuna na sam mō, hwà teshe na kpîn negwɔm mɛ.

⁴⁰Hwà rùnus jwa-pomo mɛ, ko nekwɔn dal mɛ hwà ga tɛ̀ nɛ na tɛ́ ɛn barin.

⁴¹Mwa vemo de be kwey be hashe pyɛ́ mɛ, yére dyuk ye shɛgɛsh hɛ.

⁴²Hwà nɔ̂ng vê repugu mɛ wɛng, hwà tɛ̀ vemo de be bɛɛ hɛ ves be vɔk yey pyɛng.

⁴³Hwà lashe pyɛ̂ como mɛ, hwà nɔng ɛ wɛng e como wɛt.

⁴⁴Hwà tɛ̀ ɛ, a bidɛ nerey mɛ, hwà gang gwofwa negwɔm mɛ.

⁴⁵Hwà tɛt a yɛ nepyak neshey, hwà kyiri hɛ na rekyen.

⁴⁶Vɔk e yɛ̌ jeng à Dagwi Darwey de hwô kyɛ́ o nà wok me ɛ? Vɔk e nesheneshey a? Vɔk e yɛ̌ jeng de shom mō yê sǎ e de raye me ɛ?

⁴⁷Neken hom na rɔɔ ba a? Hwà yong bemasi, vit a retin a?

⁴⁸Hwak a sé de ê nàra kwen sana ku bɛ? Hwak a sé de ê tɔk hywit ɛ sana yel e sak bɛ?

⁴⁹À Darwey, sɛ́ de hwô ra, na hwo dura a wot mɛ nerat mō ne yimo ɛ? Hwà kana sira a Davit, hwô dura a yɛ nɛ, ko tsak o mō wɛ a lek mō.

⁵⁰Bàre na besam mō de be byɛs ɛn. Me wɔlsɔk dusâ yére bemât jey pyak.

⁵¹À Dagwi Darwey, vê repugu mō be byɛs gbɔng gwɔ̀m de hwà kasa! Bé byɛs ɛ kagwa de ba di ɛ.

⁵²Bē somo Dagwi Darwey nesheneshey! Ano, a sè ano!