Read berom Lɛlɛ 9 Bible Online

Lɛlɛ 9 - berom bible

Lɛlɛ 9

¹Lwɛlɛ̂ Davit, de be ra gwɛ na fwɔ̂ lwɛlɛ̂ “Rekû hwey.” À Dagwi Darwey, me somo hwo na yey hom mwa, me ha mwa pyɛ̂ bes de hwà ga ra.

²À Dagwi De Hwà Dal Na Reto Mwa, yey hom ya pɛngɛ, ma sé ra a hwo lwɛlɛ na yom, ma sé rɛ̌ na nzem yɔkyɔk yaga hwo!

³Jeng de bemât repugu hom be di o, be to ɛn na bama, be gabsa, be vɛ̌ wey.

⁴Hwà ga sangal e gwofwa negwɔm mō, ko hwà ga gas a me shɔt e tē, shɔt mō ya sé tsak o.

⁵Hwà ga tusa yére dyuk de ya tɔk o wɛt, hwà ga wey na bemat beves, hwà ga tɛ̀, be ye bam a reza mɛn nesheneshey.

⁶Hwà ga wey na bemât repugu mot, hwà ga rùnus bagbɔng bapomo mɛn hywiri, ko ba ga ye bam na vɛ vitvit.

⁷Ko hwo, a Dagwi Darwey, hwà sé gbɔng gwɔ̀m nesheneshey, hwà sé sangal e ra gwofwa negwɔm yaga râ shɔt.

⁸E hwo de hwó ra a jey shɔt tsak o, hwó gas a yére bemât jey shɔt e tē.

⁹Hwà sé a vemo de be midra a yɛn kwɔ̂n dal, e jeng reyɔm, yɛn a sé e vwɔ mō.

¹⁰Vemo de ba tɔk o, be tɛ̀ gap mɛn e ra hwo, yaga hwó kyɛ́ o mwat de e vey na hwo wɛt.

¹¹Dagwi Darwey e re negwɔm e Raku Siyɔn. Rá in a yɛ lwɛlɛ na yōm, ha in a yére bemât jey pyɛ́ de a ga ra.

¹²Dagwi e wok sesîn bepɛng, e ye bam a rezot de be tak a yɛn wɛt, ko e tabak vemo de be tak a vere mo.

¹³Wok nemwishish hom à Dagwi Darwey! Di reyɔm de bemat de be bɛɛ me ves be vey a me mɛ! Sey me yi e nû reku,

¹⁴ko mê tumal e rwi repomô Siyɔn, na me ha mwa pyɛ́ de ya tɛ̀, me somo hwo. Mê rɛ̌ na nzem, yaga hwà sey me.

¹⁵Yére dyuk de ya tɔk o wɛt ya ga cing revɔng, ko ya ga gaba ɛ, ya ga rene segun, ko ya ga hwo e ji mo.

¹⁶À Dagwi Darwey, be tɔk o yaga gwong de hwó yɛt shɔ̄t, ko bemat beves bê hwo e ji segun mɛn.

¹⁷Bemât beves bê kyè vɔk e kwɔ̂n bevuvwel, kwɔ̂n mwa yére bemât jey de ye kyɛ́ ɛn Dagwi à hane.

¹⁸Ko Dagwi ê ye bam a bemat de be jama sɛlɛ kayɛ jeng wɛt, bepɛng bê re nuyel na sɛ̂t yey mɛn e ra yɛ jojot.

¹⁹À Dagwi Darwey, tɛ̀ nu! Hwo tik mwasi a dak gèy na hwo wɛt! Tik yére dyuk de ya tɔk o wɛt ye tumal e nuyel mō, na hwo yɛrɛ a yɛ shɔt.

²⁰Tɛ̀ yɛ̄, ye wok bengyip, Tik ye tɔk wɔgɔ, ya sé bemasi zɔng.