Read berom Lɛlɛ 90 Bible Online

Lɛlɛ 90 - berom bible

Lɛlɛ 90

¹Wôn Mose, mwât Dagwi. À Darwey, yimo e bedabeda mot, hwà sé a wot kwɔ̂n dal.

²Gyam hwo yong beraku, gyam hwo yong jey, hwo wɛ hwà sé Dagwi kayɛ jeng, ko hwô se Dagwi nesheneshey.

³Hwó tâng bemasi, “Tɛ́ in pyɛ de yin a kana sè.” Ano, yɛn e ku, bé to ɛn fongol.

⁴Neshey gu rining na sé sede pɔlɔ hining na hwo, na sé sede e yos zɔng, sede kejeng tyɔng de mwat a nɔ̀t ɛ kenevwa.

⁵Hwó hashe nekên bemasi, bé tē bit sede negwi. Ba sé sede sɔng:

⁶gwó tulu, gwo ras nagasi, ko nahywegelek gwo ye nɔɔshɔsh, gwo hworok.

⁷Shom mō ya sé ré ot, ye tɛ̀sɛ hot, wot a tē lot.

⁸Hwó bɛrɛng hot jeng de wot a sê râ banɛn zɔng wɛt, ko hwó kulsa neburu de wot e lɛsɛ arɔng.

⁹Neken mot nê tānga tala hɛn yaga shom mō, ne kweres sede hwɔtɔ̂ nesong.

¹⁰Wot ê tɔk wul neshey kuru bataama, gyeng kuru rwit, ka sede wot a rɔngɔl na gap. E ji neshey nemo mo, nehak na sé de na dal na nerat, ko nɛ̀ mwa arɔng ne vey na yɔ́m na lashê yey. Neshey ne kweres pyùu, jeng tyɔng, wot a ga kyè.

¹¹Wa a tɔk yɛnɛ̂ shom mō ɛ? Ya sé ryey o tyɛng na sap de hwó simo yi na wot.

¹²Basa a wot, na wot a ra fwom rwat na nepɔlɔ de wot a vɔk, ano, wot ê vɔk netsitsɛng.

¹³Vɔk e yɛ̌ jeng de hwô ra shom ɛ? À Dagwi Darwey, wot a sé besam mō, wok nemwishish mot, ko hwo yē ros à shom mō!

¹⁴Tik wot a tɔk kanɛ nagasi, hwó tɛ̀ yey na wot. Ano, wot ê mok lwɛlɛ na yey pyɛng vɔk e yɛnɛ̂ neken mot.

¹⁵Hwà ga vɛ neshey e de tabak hot, ko wot a ga di neshey sɔ̂ rezot. A remo, nɔng ot neshey yey pyɛng de na wul nepyak nane mo.

¹⁶Tik, wot de wot a sé besam mō wot a di tomong mō, tik nèy mot ne di gbɔng nerey mō arɔng.

¹⁷À Darwey, Dagwi mot, vɔk ot naka! Tik fwom mot gwo re nuyel! Ey, tik wot di wɛng e gwɛ!