Read berom Lɛlɛ 91 Bible Online

Lɛlɛ 91 - berom bible

Lɛlɛ 91

¹Mwat womo de Dagwi De A Dal Na Reto Mwa e dul ɛ, womo de a sé e nɛ̂n Dagwi Wo Retô Mwa,

²a rɔda yâng Dagwi Darwey, “Hwà sé a me sede fwara, kwɔ̂n dal hom. À Dagwi hom, ma tɛ̀ gap e ra hwo!”

³Mwin, a sé Dagwi de ê sey o yi e bagun de ba rene yaga hwo, a rɔda tɛ̀ o tyang yi e tumbang.

⁴A rɔda kyiri hwo, sede congot ye gunung nèy yɛ e nɛ̂n bafabak yɛ. Tsak o mɛ wô dul o sede ruga.

⁵Ano, hwô wok bengyip pyɛ cak wɛt: kɛ a sé galumla e naturuk, kɛ ket de be tabas nagwi,

⁶kɛ tumbang de wo hwo e lwil, kɛ rezot de re sɛ̀ o hák e tê jey.

⁷Mwa ano de bemat gu bê ku e hagat mo, kɛ bê wey na gu kuru bagat na hwo, ko pyɛ cak yê sɛ̀ o wɛt.

⁸Tɛ̀ bayis mō, ko hwô di de Dagwi ê tabak bemat beves.

⁹Ey, Dagwi Darwey, a sé a hwo kwɔ̂n dal. Ka sede hwà ga kasa kwɔ̂n sangal mō bagat na Yɛ De A Dal Na Reto Mwa,

¹⁰vit a pyɛ vyes cak de yê sɛ̀ o, vit a gawey de hê hwo e ra lɔ mō.

¹¹A rɔda nɔ̂ng betom-lagwi mɛ nu, bē dul o mwa kwɔn de hwó kyè vɔk ɛ.

¹²Bê vɔk o e vɔ mɛn, yaga na hwo kwon tiri bol mō na gwofwa wɛt.

¹³Begukum tanga begwɔ̄m bê tɔk mǎ hwo wɛt, hwô bɔrɔs vɛ mwa.

¹⁴Dagwi pyɛ mɛ e tē: “Remo de a ga tɛ̀ yey na me, mê sey ɛ, mê dul ɛ, yaga a tɔk me, e nɔng me nerey.

¹⁵Jeng de a yila me, ma rɔda hanat a yɛ, ma rɔda se tanga yɛ e ji reyɔm, ma rɔda sey ɛ, ko mê nɔng ɛ nerey.

¹⁶Ma rɔda nɔng ɛ pɔlɔ lis, ê sɛ̀ sɛlɛ de a tɛ̀ yey, ê sɛ̀.”