Read berom Lɛlɛ 92 Bible Online

Lɛlɛ 92 - berom bible

Lɛlɛ 92

¹Lwɛlɛ yaga Tuk Shábat. A jam na be feng a hwo à Dagwi Darwey, na be ra a hwo de Hwà Dal Na Reto Mwa lwɛlɛ!

²A jam na be mok e ra tɛ̂ yey mō kanɛ nagasi, na be ha e ra tsak o mō kanɛ naturuk,

³e jeng de be ra lwɛlɛ de gwo rɔgɔm na yom kwo tanga yom shi.

⁴À Dagwi Darwey, ma vɔk yey pyɛng yaga tomong mō, me ra biibi yaga pyɛ́ de hwà ga ra.

⁵Pyɛ́ de hwà ga ra mo ya sé ryey o à Dagwi Darwey! Báre mō ha dal gâp tɔk mot!

⁶Tɔ́n e tɔk tɔk hɛ wɛt, mwat de vit a hɛ na rato ê jut hɛ pyɛ wɛt.

⁷Mwa ano de bemat beves be tūlsa sede sɔng, vemo de be ragas nengyas be re nuyel, Dagwi ê wey na yɛn hywiri.

⁸Ko hwo, à Dagwi Darwey, hwà dal kayɛ pyɛ na nerey nesheneshey.

⁹Vê repugu mō bê wey, ey, bê wey, mwa vemo de be ragas nengyas — bê shara hɛn.

¹⁰Hwà ga gwɛ̌ a me gap sede cungun, hwà sey me na vɔ ba, hwà shushu me na něy nerat.

¹¹Ma ga di gabâ bemât repugu hom, ma ga wok fwɔ̂ sesîn bemât nengyas de ba hwo e ra me.

¹²Vemo de be gyeng hâ Dagwi bê ras sede retîn tyet, bê sè beting, bê vɔk gap sede tîn cǒ.[35]

¹³Bê sè sede cɔgɔt de ba tus e lalâ duk re a Dagwi fongol, bê re nuyel, yaga ba sé bagat na Dagwi Darwey, Dagwi mot.

¹⁴Bê sè sede cɔgɔt de ye mara nèy, mwa ano de ya ga vɛ neshey, ko kayɛ jeng ya vɔk gap, ya sé wɛkwɛk.

¹⁵Hemo he dura Dagwi Darwey e ra pyɛ́ de ya sé yɛt. Bé tɔk tɛ̀ gap e ra yɛ, a vɔk nenu neba wɛt.