Read berom Lɛlɛ 94 Bible Online

Lɛlɛ 94 - berom bible

Lɛlɛ 94

¹À Dagwi Darwey, hwó tabak bemât ragas neves. Vey, dura shom mō!

²Hwà sé mwât ra a jey mwa shɔt. Sogo, ra pyɛ cak! Tala a bemât tôs to pyɛ de ya jam yaga yɛn.

³Vɔk e yɛ̌ jeng de bemat beves bê rɛ̌ na nzem ɛ? Vɔk e yɛ̌ jeng, à Dagwi Darwey ɛ?

⁴Bemât ragas nengyas bé nàra e de paà kwas, bé sǎ e de dâk gèy.

⁵À Dagwi Darwey, bé midra a bemat mō, bé weres na vemo de ba sé bemo.

⁶Bé mɔbɔs bekuma tanga nehyɛn, bé weres na bemat beduk de ba sé sangal e sevwel mot.

⁷Ko bé tē, “Dagwi Darwey, Dagwi wo Yakɔp e bɛrɛng wɛt. Pyɛ mɛ ya sé ɛ wɛt.”

⁸À yin betɔn, bare hin! Yin de vit a hin nà rato, yin ê vey tɛ̀ netsitsɛng nayu ɛ?

⁹Dagwi de a yong a wot betong, e wokos wɛt a? Yɛ de a yong a wot bayis, e bɛrɛng wɛt a?

¹⁰Yɛ de e gyong yére dyuk, ê tabak hot wɛt a? Yɛ de e basa a bemasi begwong mɛ, ê tɔk pyɛ́ de wot e ra wɛt a?

¹¹Dagwi Darwey a tɔk bare bemasi, a tɔk, ha sé yapyi zɔng.

¹²À Dagwi Darwey, vê wɛng a vemo de hwó gyong ɛn, vemo de hwó basa a yɛn badu mō!

¹³Hwó nɔng ɛn pɔngɔ e jeng reyɔm, yɛn e gyeng sɛ̌ ba cing a bemat beves sak.

¹⁴Hwô ye waa a bemat mō wɛt, hwà rɔda ye zak a vemo de ba sé bemo wɛt.

¹⁵Bemât râ shɔt bê to hwo gas shɔt e tē, ko vemo de neyey mɛn na sé yɛt bê dyɛng e ma e yɛn.

¹⁶Wa ê tumal a me e ra bemat beves arɛt? Wa ê sey me yi e vwɔ̂ bemat nengyas ɛ?

¹⁷À Dagwi Darwey, ka hwà yang sɛlɛ me wɛt, ka ê ros wɛt, ma yang bomo bong.

¹⁸Jeng de ma di, ma sé bagat e nû reku, ma bare, hwà tɛ̀ yey na me, ko hemo ha gwɛ̌ a me gap.

¹⁹Ko jeng de yey hom ya sila na bɔrɔk, hwà wɔrɔk me, hwà pɛngɛ a me yey.

²⁰Hwó kyɛ́ o bemât shɔt de be gas shɔt e tē wɛt, hwó kyɛ́ o vemo de be ra pyɛ́ de redu ra ro mɛ arɔng.

²¹Be man to, na be wey na bemat berat, ko be yɛrɛ a vemo de vit a hɛn na nɛn shɔt.

²²Ko hwo, à Dagwi Darwey, Dagwi hom, hwà sé a me sede fwara, kwɔn dal de me tele vɔk ɛ.

²³Hwô tala vê repugu hom nengyas mɛn, hwô wey na yɛn yi na tomong ves de ba ga ra. Ey, hwô wey na yɛn, à Dagwi Darwey, Dagwi mot.