Read berom Lɛlɛ 97 Bible Online

Lɛlɛ 97 - berom bible

Lɛlɛ 97

¹Dagwi Darwey a sé gbɔng gwɔ̀m! Tik bemât jey be rɛ̌ na nzem, tik mwa vemo de ba sé sangal e bazik be vɔk yey pyɛng!

²Bale basit be rɔnɔ hɛ, tîs negwɔm mɛ hɛ a gâs shɔt e tē na gyêng badu.

³Kya hê kwey e yel mɛ, hê re mwa bemât repugu mɛ.

⁴Nedɛbɛt mɛ ne tɛ̀ negbey e ra jey, jey ye di, ko ye digis.

⁵Beraku be tē ywey e nuyêl Dagwi Darwey, Dâ Jey Mwa sede negang bagat na kya.

⁶Lagwi wo tē, “Dagwi e gas shɔt e tē!” Ko bemat mwa be bɛrɛng gbɔng nerey mɛ.

⁷Mwa vemo de be re a pyɛ́ de ba yong fongol, mwa vemo de be dak gèy na yɛ de ya sé yapyi zɔng, bê sɔ rekyen. Mwa cī yê re a Dagwi Darwey fongol.

⁸Jeng de bemât Siyɔn ba wok ano, ba vɔk yey pyɛng, bemât bapomô Yuda bê rɛ̌ na nzem, yaga yɛrɛ̂ shɔt mō, à Dagwi Darwey.

⁹Dagwi Darwey hwà dal na reto mwa e jey. Hwà dal mwa cī na reto ding-ding.

¹⁰À yin de yin e tɛ̀ yey na Dagwi, kyɛ́ in neves. E gyeng nekên vemo de ba sé pang na yɛ, e seres hɛn yi e vwɔ̂ bemat beves.

¹¹Nerât Dagwi nê sè e ra vemo de be gyeng ha mɛ, sede negbey, nê pɛngɛ neyey vemo de ba sé yɛt.

¹²Vɔk in yey pyɛng na Dagwi Darwey, à yin bemat berat! Bàre hin, yɛ a sé wo jɛrɛ, ko yin feng a yɛ!