Read berom Cīnat Neha 1 Bible Online

Cīnat Neha 1 - berom bible

Cīnat Neha 1

¹Cīnat neha Gbɔng Gwɔ̀m Sɔlɔmɔn Davit, gbɔng gwɔ̀m Israyɛl,

²na bemat be bin tɔk netsitsɛng na basa, be vɔk tɔ́k-tsik na tɔ̂k cap neha ciwil,

³na be bin sɛ̀ basa na tɔ̂k ra pyɛ́ na netsitsɛng, na necik na gas badu e tē, na bare rat,

⁴na vê dunus be basa nehywɛ râ pyɛ, na bewen be basa gwông sangal rwat,

⁵na wo netsitsɛng arɔng a bin wok ko e gwɛ̌ tɔk, mwat de a vɔk tɔ́k-tsik e sɛ̀ sekwɛl,

⁶na yɛn a bin tɔk cinat ha tanga pyɛ̂ negbang, neha vê netsitsɛng tanga nerangsâl rigim.

⁷Sâp Dagwi Darwey, hɛ à susû tɔ́k, betɔn be byɛs netsitsɛng na basa.

⁸À hwey hom, wet betong na basâ da mo, ko hwo kyɛ́ o masâ neng mō wɛt,

⁹yê sè a hwo naka sede cúyu e rato mō, sede lwɛlɛ rwat e fwɔ mō.

¹⁰À hwey hom, ka sede bemat beves ba tɔgɔs hwo, hwo kwon simo wɛt.

¹¹Ka ba ye, “Vey wot kyè wɔ̀ lɛrɛ hot e gwong yaga shushu nemi, wot hwo e ra bemat de vit a hɛn na sɛlɛ,

¹²be ye wot wɔlɔk hɛn na neken sede sak, wot pere tomo na yɛn wɔ e kwɔn bevuvwel.

¹³Wot ê sɛ̀ mwa pyɛ́ ryat sizɔng, wot ê sila nelɔ mot na pyɛ́ de wot a sey ɛ na yɛn.

¹⁴Wot ê gas yɛ e tē mot, tyɛng na nepyak mot.”

¹⁵À hwey hom, hwo raa gwong mɛn wɛt, gas tó mō na yɛn,

¹⁶yaga bol mɛn be tele wɔ̀ ra pyɛ́ vyes, ko be ra dey-dey wɔ shushu nemi.

¹⁷A sé yapyi zɔng, renê segun e bayîs non.

¹⁸Ko bemat vemo de be sǎ e waba e ra neken mɛn, yɛn e rene pyɛ de ye mɔrɔ neken mɛn.

¹⁹Yerê pyɛ́ de mwat e sɛ̀ na yol, yɛ jut nekên mwat o.

²⁰Netsitsɛng né mok na gbɔng fwɔ e nehyok, ne tē nèy à fwɔ e bebajang,

²¹ka e ji regyɛng bemat ne yila, e dúra bemakuk vê repomo.

²²Ne tē, “À yin vê dunus yaga sɛ́ de yin ê sangal e dunus ɛ? À yin vê byɛs, yaga sɛ́ de yin ê sangal e byɛs min ɛ? À yin betɔn, yaga sɛ́ de yin ê kyɛ́ in tɔk ɛ?

²³Wet betong na gyong hom mwin. Mê wunta a hwo yey hom, mê tɛ̀ hwo tɔk bare hom.

²⁴Maga rini hwo ko hwà kyɛ́ o nà wet betong, ma nára vwɔ hom vit a mwat de a wok me,

²⁵yin a ga kyɛ́ in mwa vô redu hom, ko yin e to sey gyong hom wɛt.

²⁶Me arɔng mê shɛgɛsh reyɔm min, mê feng ɛ wɛng jeng de rezot ra sɛ̀ in.

²⁷Jeng de negbang na hwo e ra yin sede gwogul rwak, ko rezot re vey sede wula, jeng de yin e tak yɔ́m na nepep royo.

²⁸Ano kwong yɛn ê yila ko mê hanat wɛt, yɛn ê ye ngyɛ́k e de jama me ko bê sɛ̀ me wɛt.

²⁹Yɛn a kyɛ́ ɛn tɔk, ko ba kasa sâp Dagwi Darwey wɛt.

³⁰Yɛn a ga sang simo vô redu hom wɛt, ko ba byɛs mwa gyongos hom.

³¹Yɛn ê yɛt bwal negwɔn neves mɛn, bê sirik na begwong beves mɛn de be yongos.

³²Sogô nehywɛ vê dunus ne wey na yɛn, nerirî betɔn ne mɔbɔs hɛn.

³³Ko womo de e wet betong na ha hom ê sangal tyang, ê vɔk yey pyɛng e sangal tyang vit a bengyip reyɔm.”