Read berom Cīnat Neha 10 Bible Online

Cīnat Neha 10 - berom bible

Cīnat Neha 10

¹Hwêy netsitsɛng dâ hɛ e vɔk yey pyɛng, ko tɔ̂n hwey, he lashê yey neng mɛ.

²Nedanerey de ba sɛ̀ e begwong beves ne nɔng pyɔlɔ wɛt, ko necik ne sey neken yi e reku.

³Dagwi Darwey e tik be re vyong wɛt, ko e tik mwat vwes a sɛ̀ pyɛ́ de a vɔk cwey yɛ wɛt.

⁴Vwɔ̂ riri gwo vey na nepɛng, ko vwɔ̂ wo té ngyɛ́k e râ fwom gwo vey na nedanerey.

⁵Hwey de he tula pyɛ̂ hey nahywɛp ha sé tsɛng-tsɛng, ko womo de e dyɛngɛs nevwa e jeng bwal a sé wo rekyen.

⁶Be tɛ̀ nerat e ratô mwat de a sé cik, ko nû mwat vwes he lɛrɛ yol.

⁷Báre na mwat de a sé cik ha sé nerat, ko rezâ mwat vwes rê bɔsɔ.

⁸Mwât netsitsɛng e yey e gyeng du, tɔn de a vɔk nu kpɛɛ bê wey na yɛ.

⁹Mwat de e kyè gyat e kyè tyang, ko womo de begwong mɛ ba sé gwɔdɔrɔk bê tɔk.

¹⁰Womo de e tē mwǎt a bayis e vɛ̀sɛ na reyɔm, ko womo de e gyong wɛshɛrɛk e tɛ̀ be sangal tyang.

¹¹Nû mwât cik he nɔng neken sede lwel nshi, ko nû mwat vwes he lɛrɛ yol.

¹²Pugu he sogo cuna, ko tɛ̂ yey he bangas neburu mwa.

¹³Nu de ha vɔk tɔ́k-tsik he ha netsitsɛng, ko mâ tɔn be tabak hɛ na gwele.

¹⁴Mwât netsitsɛng e lɛrɛ tɔk, nepyak neha tɔn ne tanga vey na wey.

¹⁵Dyâm darwey ya sé a yɛ sede ruga, ko nepɛ̂ng pwɛng ne vey na wey.

¹⁶Pyɔlɔ̂ wò cik ya sé neken, pyɛ de be sɛ̀ na mwat vwes à banɛn.

¹⁷Mwat de e gyeng tabak a sé e gwong neken, ko womo de e kyɛ́ ɛ gyong e vuru hɛ.

¹⁸Mwat de e lɛrɛ repugu a sé mwât kwɛlɛng, ko mwat de e bere ryɔgɔt kpɛɛ a sé tɔn.

¹⁹Neha ne kat ko be bidɛ buru wɛt, ko womo de e vɔk nu gak a sé wo sekwɛl.

²⁰Neha wò cik na sé sede celes dyam pyɛng, barê mwat vwes ha sé yapyi zɔng.

²¹Neha mwat rwat ne re na bemat pyak, ko betɔn be kushu yaga dunus.

²²Nerat Dagwi Darwey ne vey na nedanerey, ko râ fwom pyak he vey na yele wɛt.

²³Rágas neves ha sé a tɔn sede jɔgɔ, ko negwɔn netsitsɛng na sé a mwât tɔk pyɛ̂ yey pyɛng.

²⁴Pyɛ́ de mwat vwes e wok bengyip yɛ̄, yé hwo e ra yɛ̀, mwat rwat ê sɛ̀ pyɛ̂ cwey mɛ.

²⁵Jeng de gwogul rwak gwo kwey, mwat vwes e to sè wɛt, ko wò cik a ga tɛ̀ tis gbak-gbak.

²⁶Sede tamang e yìn, sede kyeng e bayis, ano de riri a sé na mwat de a nɔng ɛ fwom.

²⁷Sâp Dagwi Darwey hê gwɛ a hwo nepɔlɔ, ko neshey mwat vwes bê tɛt nɛ̀.

²⁸Sɛ̂t yey bemât cik he yɛnɛ na yey pyɛng, ko cwey pyɛ̂ bemat beves be sang sɛ̀ wɛt.

²⁹Dagwi Darwey a sé kwɔ̂n dal na womo de a sila gyat, ko e wey na vê râ pyɛ́ vyes.

³⁰Wo cik bê sang digta hɛ wɛt, ko bemat beves bê sang sangal e vwel o wɛt.

³¹Nû mwât cik he nɔng netsitsɛng, ko bê yang vê kwɛlɛng be man nu.

³²Nû wò cik ha tɔk pyɛ de ya sé tyɛng, ko nû beves he ha nebɔs.