Read berom Cīnat Neha 11 Bible Online

Cīnat Neha 11 - berom bible

Cīnat Neha 11

¹Pyɛ-masa yè mɔt ya sé pyɛ byɛm-byɛm na Dagwi Darwey, ko pyɛ-masa yè tsak o ya sé pyɛ yey pyɛng na yɛ.

²Jeng de tôs to ha yel, rekyen rê vey, ko na mwat de e dyɛng to, netsitsɛng na sé.

³Mwât sila gyat e tɔk gwong tyɛng yi na negyat mɛ, ko mwât gwɔdɔrɔk ê wey yi na negwɔdɔrɔk mɛ.

⁴Nedanerey ne vɔk sɛlɛ tuk shom wɛt, ko necik ne sey neken tuk reku.

⁵Mwât cik de vit a nɛn, begwong mɛ ba sé gyat, ko mwat vwes e gaba yi na neves mɛ.

⁶Mwât cik de a sila gyat e sey ɛ yi na necik mɛ, ko vê kwɛlɛng be vo ɛn e como yaga cwey mɛn.

⁷Sede mwat vwes e ku, pyɛ́ de e sɛt yey e yɛ ya ga wey, nerey de a tɛ̀ yey e ra nɛ̀ na rɔda sè pyɛ cak wɛt.

⁸Bé sey mwât cik yi e yɔ́m, ko mwat vwes e yel e hɛ e to mo.

⁹A sé yi na hâ nu mɛ de mwat de e sap Dagwi wɛt, e wey na mwat vwara mɛ, ko a sé yi na tɔk de vê cik be sey to mɛn.

¹⁰Jeng de pyɛ́ ye kyè naka na vê cik, repomo re vɔk yey pyɛng, ko jeng de bemat beves ba wey, hwô wok be ra kililii.

¹¹Yi na nerât vê sila gyat repomo re sogo, ko neha bemat beves ne wey na hɛ.

¹²Yɛ de e byɛs mwat vwara mɛ a sé dunus, ko mwat de a vɔk tɔ́k-tsik e sǎ yuu.

¹³Yɛ de e kyě ra ryɔgɔt e paa nesang, ko mwât gabik tsak o e bang pyɛ̂ neyaang.

¹⁴Repomo de vit a bemat netsitsɛng, he tala na wey, ko na nepyak bemat vos badu barat netyang nê sè.

¹⁵Yɛ de a tumal a mwat duk wɔgɔ, ê tala a yɛ redu mɛ e wok na bek, ko womo de a kyɛ́ ɛ tumal o a ga sey to mɛ.

¹⁶Hwā de e dura nerat be nɔng ɛ nerey, ko bemât jáma na retek be vɔk nedanerey.

¹⁷Mwat de e dura tsak tɛ̂ yey e ra a to mɛ nɔrɔ-rat, ko mwât râ pyɛ vyes e nɔ̂ng to mɛ reyɔm.

¹⁸Mwat vwes e sɛ̀ sehwoyo e gwông kwɛlɛng, ko mwat de a tus necik, pyɔlɔ mɛ ya sé yê mwin.

¹⁹Mwat de a tumal e ra pyɛ́ cik, nepɔlɔ mɛ ne gwɛ hɛn, ko mwat de e raa begwong beves, e ro reku mɛ.

²⁰Vê yey gwɔdɔrɔk, ba sé pyɛ byɛm-byɛm na Dagwi Darwey, vemo de vit a nɛn, ba sé pyɛ yey pyɛng na yɛ.

²¹Tɔ̀k mwin, mwat vwes bê tik nà tabak hɛ wɛt, ko vê cik bê sey ɛn.

²²Sede yɔbɔ̂ dyam shinang e wôl zà ano de zɛrɛ̂ hwā sana nehywɛ râ pyɛ́, a sé.

²³Cwey vê cik ye tala na nerat, ko sɛt bayis bemat beves he yɛnɛ na shom zɔng.

²⁴Mwat hwak e nɔngɔs washak, mwa ano e gwɛsɛ̂ nedanerey, ko hwak e sè tuushush, ko e re reyɔm na nepɛng.

²⁵Ka hwó viri vwɔ, hwô gwɛsɛ nedanerey, ka hwà nɔ̂ng mwat hwak nshi a sɔ, hwak ê ba nɔng o arɔng.

²⁶Be mok gawey e ra womo de e bang pyɛ́ e gban, ko nerat e ra womo de e rɛsɛl yɛ.

²⁷Mwât tē ngyɛ́k e jama pyɛ́ ryat, e jama nemi nepɛng, ko womo de e jama râ nengyas, nê toyo e ra yɛ.

²⁸Womo de a tɛ̀ gap e ra nedanerey mɛ, nê hworok sede sɔng, ko vê cik bê ras sede gworwang gwim-gwim.

²⁹Yɛ de e nɔ̂ng belɔ mɛ reyɔm ê re nedanelɔ gul, ko tɔn ê tɛ́ ɛ mwât fwom wo netsitsɛng.

³⁰Tomông wo cik ba sé sede tîn cɔgɔt neken, mwat netsitsɛng e tɛ̀ bemat be simo be dyɛng a yɛ mā.

³¹Ka sede vê cik be sey tabak e jey, tàga bemat beves na vê banɛn arɛt?