Read berom Cīnat Neha 12 Bible Online

Cīnat Neha 12 - berom bible

Cīnat Neha 12

¹Kawɛ de e simo be tabak hɛ, e simo tɔk, ko womo de e kyɛ́ ɛ gyong a sé tɔn.

²Mwat rwat e sɛ̀ nemi nepɛng yi na Dagwi Darwey, ko e wey na mwat yongos begwong beves.

³Mwat e tɛ̀ to yi na râ pyɛ̂ vyes wɛt, ko tis mwat necik he sang dikta hɛ wɛt.

⁴Hwâ negwɔn nerat a sé sede kpin na rwas mɛ, ko hwā de e tɛ̀sɛ rekyen e kwɔrɔs a rwas mɛ nedem.

⁵Barê bemat necik ha sé tɛk, ko vô badu mwat vwes ha sé kwɛlɛng zɔng.

⁶Neha mwat vwes na sé sede bemat e lɛrɛ na be shushu nemi, ko hâ mwat de a sila gyat he sey bemat.

⁷Bé ye gup a bemat beves, be tɛ́ ɛn vit, ko lɔ̂ mwat necik hé tumal gak.

⁸Bé somo mwat sede a vɔk tɔ́k-tsik, ko be byɛs womo de a vɔk kwɛlɛng.

⁹Duga mwât dyɛ̂ng to de a vɔk mwât fwom gwining zɔng, a dal womo de e toros to ko vit a hɛ na pyɛ̂ re.

¹⁰Mwât necik e bɛrɛng yas mɛ naka, ko mwat vwes vit a tosho reyɔm.

¹¹Mwat de e how cap mɛ ê vɔk pyɛ̂ re pyak, ko mwat de e lashe jeng e jɔgɔ a sé tɔn.

¹²Bemat beves be vɔk cwey nedanerey neves, ko tis wo necik hé nɔngɔs pyɔlɔ.

¹³Mwat vwes e vos to mɛ yi na neha bɔs, ko mwat necik e hywit ɛ yi e reyɔm.

¹⁴Be tala mwat yi na pyɛ de e há, ko tomong de mwat e ra e sɛ̀ pyɔlɔ mɛ.

¹⁵Negwɔn tɔn na sé tyɛng e di mɛ, ko mwat netsitsɛng e sey vô redu.

¹⁶Shôm tɔn yé pere dura dey-dey, ko mwat netsitsɛng e jut shɔ̂k yey pyɛ wɛt.

¹⁷Mwat de e ha tsak o e nɔng nuha mwin, ko mwat nuha kwɛlɛng, e yɛt nebɔs zɔng.

¹⁸Neha mwat hwak na sé ngow sede râm wal, ko nè mwat netsitsɛng ne vey na netyang.

¹⁹Hâ tsak o hé nàra gbak-gbak, ko nû bɔs hé nàra jeng tyɔng.

²⁰Kwɛlɛng ha sé e yêy vê yong begwong beves, ko vê yong pyɛ ryat be vɔk yey pyɛng.

²¹Vit a tumbang de wo sɛ̀ mwat necik, ko bemat beves be sila na reyɔm.

²²Nû kwɛlɛng ha sé pyɛ byɛm-byɛm e nuyel Dagwi Darwey, ko vê tsak o, yɛn vɛ à pyɛ yey pyɛng mɛ.

²³Mwât netsitsɛng e lɛrɛ tɔk mɛ, ko betɔn be dura netɔn mɛn wɛshɛrɛk.

²⁴Mwat fwom na tē zip ê re negwɔm, ko bé tɛ̀ riri e fwom retek.

²⁵Bɔ́rɔk e yêy mwat he sɔ ɛ, ko há rat he tɛ̀ a vɔk yey pyɛng.

²⁶Mwat necik e doyo yi e neves, ko gwông bemat beves gwo dɔnɔ hɛn.

²⁷Riri e vo ngyama wɛt, ko mwat de e tē zip e fwom ê sɛ̀ nedanerey.

²⁸E gwông necik neken na sé, ko gwông buru gwó kyè vɔk e reku.