Read berom Cīnat Neha 13 Bible Online

Cīnat Neha 13 - berom bible

Cīnat Neha 13

¹Hwêy netsitsɛng he sey tabak yi na da mɛ, ko hwey de he làl, he wet betong na gyong wɛt.

²Be tala mwat yi na pyɛ de e ha, ko cwey vê gwɔrɔdɔk, à sógo yol.

³Mwat de e vɔk nu gak e gyeng neken mɛ, ko mwat de e rwagat nu e wey.

⁴Nekên riri ne masa yîs pyɛ, ko e sɛ̀ pyɛ wɛt, ko neken mwat de e tē ngyɛ́k e sɛ̀ nedanerey.

⁵Mwat necik e kyɛ́ ɛ bɔs, ko mwat vwes e ra tomông byɛm-byɛm na pyɛ̂ kyen.

⁶Pyɛ́ ryat mwat necik ye dul ɛ. Pyɛ́ vyes mwat banɛn yé wey na yɛ.

⁷Hwak e dura sede a vɔk nedanerey, ko vit a hɛ na pyɛ, ko hwak e ra sede a sé pwɛng, ko a vɔk nedanerey.

⁸Mwat de a vɔk nedanerey e tɔk viri to mɛ, ko a sé gbing-gbing na mwat pwɛng wɛt.

⁹Bemat berat ba sé sede negbey de ne lolo káw-kaw, ko kywa-kya bemat beves bê rimi wɛ.

¹⁰Dâk kaa he vey na pyɛ cak wɛt, sɛ̌ reyɔm, ko vê sey vô du, vê netsitsɛng a vane.

¹¹Nedanerey de ba sɛ̀ e gwong vwes nê tala hɛ tyɔng-ti-tyɔng, ko nedanerey de ba tula tyɔng-ti-tyɔng nê re nuyel na gwɛ́sɛ hɛn.

¹²Sɛ̂t yey e ra pyɛ de mwat e ros e de simo mo he tɛ̀ ɛ gbɛrɛk, ko sɛ̂ pyɛ mo he tɛ̀ ɛ wɛng-wɛng.

¹³Mwat de e byɛs ha e hwɔtɔ a to mɛ wey, ko womo de e gyenges redu bê tala hɛ pyɔlɔ.

¹⁴Bása bemat netsitsɛng ha sé sede lwel nshi neken, hé sey mwat yi e segun reku.

¹⁵Tɔ́k-tsik he vey na somo, ko gwông mwat de vit a tsak o, e gwông wey a gwane.

¹⁶Mwât netsitsɛng e ra kayɛ pyɛ na tɔk, ko tɔn e dura netɔn mɛ dɛdɛɛt.

¹⁷Tom vwes e tɛ̀ bemat e ji reyɔm, ko mwât tomo wo tsak o e vɛ̀sɛ na tɛ́ tyang.

¹⁸Nepɛng na rekyen na sé na mwat de e kyɛ́ ɛ basa, ko womo de e wet betong na gyong ê sɛ̀ nerey.

¹⁹Jeng de mwat e sɛ̀ pyɛ de a vɔk cwey o yey ye pɛngɛ, ko betɔn be bɛrɛng dóyo yi e neves sede pyɛ byɛm-byɛm.

²⁰Wo kyé na bemat netsitsɛng ê vɔk netsitsɛng, ko wo wunâ nesa na betɔn e lashe to mɛ.

²¹Gawey he re bol bemat banɛn, ko bemat necik bê sɛ̀ pyɔlɔ ryat.

²²Yerê mwat rwat yê re nedanelɔ mɛ, ko bemat berat behak be re nedanelɔ bemat banɛn.

²³Ká cap mwat pwɛng ya nɔng pyɛ̂ yeneng naka, ko vê mɔt be ye màk a pyɛ de a how.

²⁴Womo de a tik nà tabak hwey na hywèreng a sé kyɛ́ ɛ hɛ, ko womo de e tɛ̀ yey na hwey mɛ e tē ngyɛ́k na tabâk hɛ.

²⁵Mwat necik a vɔk pyɛ de ye vey a yɛ, ko jîm mwat vwes ye tak yɔ̂m nevit.