Read berom Cīnat Neha 14 Bible Online

Cīnat Neha 14 - berom bible

Cīnat Neha 14

¹Kawɛ hwâ netsitsɛng e lɔk lɔ mɛ, ko tɔn e gangas hɛ na vɔ mɛ.

²Mwat de e kyè cik e gwong, e sap Dagwi Darwey, ko womo de e ra pyɛ́ gwɔrɔdɔk e byɛs ɛ.

³Pyɛ de tɔn e ha ya sé a yɛ gwelê dak kaa, ko hâ mwat netsitsɛng he sey ɛ.

⁴Kwɔn de vit a behywàrak hôw cap, vit a pyɛ̂ yeneng, ko pyɛ́ polos be sɛ̀ yi na gâp fwom hywàrak.

⁵Mwat nuha tsak o ê ra bɔs wɛt, ko mwat nuha kwɛlɛng e yɛt bɔs.

⁶Mwat tos to e jama netsitsɛng ko e sang sɛ̀ ne wɛt, ko tɔk ha sé begelek na mwat de a vɔk sɛ́ng.

⁷Gas o yi tɔn yaga hwô sɛ̀ neha tɔk na yɛ wɛt.

⁸Mwât netsitsɛng a tɔk gwong de e kyè ɛ, ko betɔn be kyě wɔ́rɔng yaga netɔn mɛn.

⁹Dagwi e shɛgɛsh bemat beves, ko vemo de ba sila gyat be re nerat mɛ.

¹⁰Yey ya tɔk rezot de ye sɔ, ko vit a mwat duk de e tɔk hwà tɔk cap yey pyɛng o.

¹¹Lɔ de mwat vwes a lɔk hê gaba, ko bûk womo de a sila gyat gwô re nuyel na gwɛsɛ nerat.

¹²Gwong gwa sé de mwat e bare gwa sé rwat, ko e yɛnɛ mo gwó tala na reku.

¹³Ká e ji shɛgɛsh yey sit ha sé, ko yêy lashe hɛ e yɛnɛ mo.

¹⁴Mwat e yɛt bwâl pyɛ de a tus, ká ya ka sé ryat kɛ vyes ayi.

¹⁵Wo tàndang e sey tsak o na kahɛ há, ko wo netsitsɛng e bɛrɛng kwɔn de e kyè vɔk ɛ.

¹⁶Mwât netsitsɛng e wok bengyip ko a doyo yi e râ banɛn, ko tɔn, e rá pyɛ́ na nefufǔl vit a nehywɛ.

¹⁷Mwât shom ziri e ra pyɛ̂ netɔn, ko mwat de e yong neves be ra repugu na yɛ.

¹⁸Netɔn nɛ̀ a nu vê tàmang, ko kpin vê netsitsɛng, a tɔ́k.

¹⁹Beves be ye guduruk e nuyel vê naka, ko bemat beves be gyeng na bemat berat be sɛlɛ hɛn.

²⁰Mwat pwɛng be kyɛ́ ɛn hɛ, ká a ka sé mwat vwara mɛ ow, ko darwey e vɔk besa pyak.

²¹Womo de e byɛnɛng mwat vwara mɛ a sé wo nɛn, ko wo yey pyɛng à womo de e dura nerat na bepɛng.

²²Vemo de be yong pyɛ́ vyes be ye reng yi e bare yey mɛn, ko vemo de be yong pyɛ ryat be sey tsak tɛ̂ yey na tsak o.

²³E ji fwom mwa be sè pyɔlɔ, ko há zɔng-reng he vey na nepɛng.

²⁴Kpin bemat netsitsɛng wa sé nedanerey, ko tɔrɔ̂ betɔn he à netɔn zɔng.

²⁵Mwat nuhâ tsak o e seres neken, ko wo yɛt bɔs e row bemat.

²⁶E ji sap Dagwi Darwey mwat e tó yey wɛt, ko nèy mɛ nê sɛ̀ kwɔ̂n dal hê gap.

²⁷Sâp Dagwi Darwey ha sé sede lwel nshi neken, na mwat a dul to mɛ yi e segun reku.

²⁸Nepyak bemat nè a nerey gbɔng gwɔ̀m, ko sana bemat, negwɔm nê wey.

²⁹Mwat de e ra shom ziri wɛt a vɔk netsitsɛng pyak, ko womo de e pere vo shom e dura netɔn mɛ wɛshɛrɛk.

³⁰Netyâng sangal ne vey na gap rebek, ko kat cwey pyɛ́ he tɛ̀ bekup gbɛrɛk.

³¹Mwat de e mɔt pwɛng, e byɛs mwât yong mɛ, ko wo dura nerat na vê jamâ sɛlɛ, e nɔng ɛ nerey.

³²Yi na râ pyɛ́ vyes mwat e yila a to mɛ reku, ko wo necik e sɛ̀ kwɔ̂n dal yi na tsak o mɛ.

³³Netsitsɛng na sé e barê mwat de a vɔk tɔ́k-tsik, ko betɔn ba tɔk pyɛ cak e ra netsitsɛng wɛt.

³⁴Râ necik he nɔngɔs yére bemât jey nerey, ko râ banɛn he vey a yɛn na rekyen.

³⁵Mwât fwom de e kyè na gwɛ na netsitsɛng, gbɔng gwɔ̀m e pɛngɛ yey na yɛ, ko shom mɛ ye hwo e ra womo de e ra pyɛ̂ rekyen.