Read berom Cīnat Neha 15 Bible Online

Cīnat Neha 15 - berom bible

Cīnat Neha 15

¹Tóyo na ha e ji nehywɛ he tɛ̀ shom yé yē rɔ̀s, ko há ngow he sogo shom.

²Jeng de mwât netsitsɛng e ha, ha mo he tā, ko nû tɔn gwarwang ha vit a to.

³Dagwi Darwey e bɛrɛng kagwa, e bɛrɛng beves na berat.

⁴Hâ nehywɛ ha sé sede tîn cɔgɔt de yé nɔngɔs neken. Ko há ngow he wey na gabik mwat.

⁵Tɔ̂n hwey he byɛs tabâk dâ hɛ, ko womo de e simo be tɛ̀ ɛ e gwong, a vɔk netsitsɛng.

⁶E lɔ̂ wo necik ba vɔk pyɛ́ pyak e gban, ko reyɔm e ra mwat vwes na pyɛ de a sɛ̀.

⁷Neha bemat netsitsɛng ne shara tɔ́k, ko a sé ano na betɔn wɛt.

⁸Nɔrɔ̂ bemat beves ha sé pyɛ byɛm-byɛm na Dagwi Darwey, ko wôn mwat de a sila gyat he pɛngɛ a yɛ yey.

⁹Gwông mwat vwes gwa sé pyɛ byɛm-byɛm na Dagwi Darwey, ko e tɛ̀ yey na womo de e ra pyɛ́ cik.

¹⁰Womo de a ye reng yi e gwong, bê tabak hɛ vɛ̀t. Womo de a kyɛ́ ɛ gyong ê wey.

¹¹Dagwi Darwey e tɔk pyɛ neyaang yɛ kwɔ̂n bevuvwel, sɛ́ de ê tik nà di neyey bemasi ɛ?

¹²Mwat de e tos to e simo gyong wɛt, e sang jama vô redu vê netsitsɛng wɛt.

¹³Yey pyɛng yé tɛ̀ bayis be sè vwɛs-vwɛs, ko yi na lashê yey rebek re tɛ́ ɛ gbɛrɛk.

¹⁴Yey mwat de a vɔk netsitsɛng ye jama tɔk, ko pyɛ̂ re betɔn à netɔn.

¹⁵Mwa nepɔlɔ̂ rezot na sé negbang, ko yêy dyɛngɛ yé re nuyel na pɛngɛ.

¹⁶A dal naka hwo vɔk pyɛ tyɔng na sâp Dagwi Darwey, de hwo vɔk yele shɛrɛk e ji bɔrɔk yey.

¹⁷A dal naka hwo re hwonong tanga bemat de ba vɔk tɛ̂ yey, de hwo re pyɛ̂ nzem de ba yong na repugu.

¹⁸Mwât shom pep e vɛ̀sɛ na cuna, ko womo de e ra shom ziri wɛt e gas bemât râ yol.

¹⁹Gwông riri gwa sé sede ba gwɔrɔ gwɛ na serogo, ko gwông vê sila gyat gwa sé tɛ́ɛl.

²⁰Hwêy netsitsɛng hɛ he pɛngɛ a da mɛ yey, ko tɔ̂n hwey he byɛs neng hɛ.

²¹Netɔn na sé pyɛ yey pyɛng na womo de vit a tɔ́k-tsik, ko mwât netsitsɛng e kyè cik.

²²Sana vo redu, pyɛ́ de be yong yê gaba, ko na bemât badu pyak bê di wɛng.

²³Hwà nɔng hanat rat, he pɛngɛ yey, ko ha e tyɛ̂ng jeng, he ta e rɛ!

²⁴Gwông mwât netsitsɛng gwó tut vɔk e neken, ano e gas ɛ na kwɔ̂n bevuvwel.

²⁵Dagwi Darwey e rùnus lɔ̂ mwat tos to, ko e dul benap vê kuma.

²⁶Barê bemat beves ha sé pyɛ byɛm-byɛm na Dagwi Darwey, neha vê haalal né pɛngɛ a yɛ yey.

²⁷Mwat de e simo newàa neves, e tɛ̀ belɔ mɛ e ji reyɔm, ko mwat de e kyɛ́ ɛ pyɛ bang nu e ros e jey.

²⁸Bemat necik be bare gyam na be toyo na ha, ko nenu bemat beves ne shara neha neves.

²⁹Dagwi Darwey a sé yikyik na bemat beves, ko e wokos wôn bemat necik.

³⁰Shɛgɛsh hé pɛngɛ a mwat yey, ko yɛgɛt yat ye turu a yɛ bekup.

³¹Womo de a tɛ̀ nehywɛ na gyong, a sé e ji vê netsitsɛng.

³²Mwat de a kyɛ́ ɛ basa a ga byɛs tó mɛ, ko womo de e sey gyong e gwɛ̌ netsitsɛng.

³³Sâp Dagwi Darwey he basa gwông netsitsɛng, ko dyɛng to he yɛnɛ na nerey.