Read berom Cīnat Neha 16 Bible Online

Cīnat Neha 16 - berom bible

Cīnat Neha 16

¹Mwat e tɔk yong pyɛ de e ra, ko Dagwi yɛ e tala.

²Mwat e tɔk bare pyɛ́ de e ra ya sé tyɛng, ko Dagwi Darwey e masa yey mɛ.

³Nára a Dagwi Darwey tomong mō, ko pyɛ́ de hwà yong yê tumal.

⁴Dagwi Darwey a ga yong gwong de kayɛ pyɛ yé sè, ey mwa na bemat beves yaga tûk reyɔm.

⁵Kawɛ mwât paà kwas a sé pyɛ byɛm-byɛm na Dagwi Darwey, mwin, bê tik nà tabak hɛ wɛt.

⁶Yi na tsak tɛ̂ yey na tsak o be tala banɛn, ko yi na sâp Dagwi Darwey mwat e gas ɛ na neves.

⁷Jeng de negwɔn mwat na pɛngɛ a Dagwi Darwey yey, bemat repugu mɛ e tɛ̀ be sangal tyang na yɛ.

⁸A dal naka hwo vɔk pyɛ tyɔng e ji necik, na sɛ̂ nerey pyak e gwông tsak o wɛt.

⁹Mwasi e yong gwong mɛ, ko Dagwi Darwey e gyeng bɔrɔs mɛ.

¹⁰Gwɔ̀m e yɛt ha na bes, e vɔk buru e yɛrɛ̂ shɔt wɛt.

¹¹Dagwi Darwey e simo pyɛ̂ mwa yê tsak o, a tɔk mwa pyɛ̂ masa yê mwat masa.

¹²A sé pyɛ byɛm-byɛm de begwɔ̀m be ra banɛn, yaga gwofwa negwɔm gwa tumal e ra necik.

¹³Gwɔ̀m e simo a wok hâ cik, ko a rɔda dal na simô mwat de e ha tyɛng.

¹⁴Shôm gwɔ̀m ye yē puu, ye tɔk tɛ̀ be mɔrɔ mwat, ko mwât netsitsɛng e tɛ̀ yey mɛ ye yē rɔ̀s.

¹⁵Jeng de bayis gwɔ̀m be nɛp yaga yey pyɛng, e nɔng bemat neken, dura nerat mɛ ha sé sede bale rwak de wa vey na nshi naswigi.

¹⁶Vɔ̂k netsitsɛng ha dal celes dyam shinang, vɔ̂k tɔ́k-tsik ha sé pyɛ kasa e ra dyam pyɛng.

¹⁷Bemat berat be kyè e gwong de gwa ye wek yi e neves, womo de e gyeng gwong mɛ e dul neken mɛ.

¹⁸Dak kaa he kyè na mwat vɔk e wey, ko paà kwas he tɛ̀ mwat a gaba.

¹⁹Duga hwo tɛ́ o gwining e ji bepɛng vê dyɛng to, a dal de hwô gas pyɛ́ de ba hashe na bemât paà kwas.

²⁰Womo de e tɛ̀ nehywɛ e basa ê re nuyel, ko wò wɛng à womo de e tɛ̀ gap e ra Dagwi Darwey.

²¹Mwât netsitsɛng e yey be yila hɛ à mwat tɔ́k-tsik, ko bemat be sey há de ha tá.

²²Tɔ́k-tsik ha sé sede lwel nshî neken na womo de a vɔk hɛ, ko betɔn be tabak hɛn yi na netɔn mɛn.

²³Wo netsitsɛng e tē naka na ha mɛ, pyɛ de e ha ye hwɔtɔ nehywɛ bemat.

²⁴Ha rat ha ta mwɛɛsɛs sede shok, ha sé pyɛ yey pyɛng, pyɛ turû netyang rebek.

²⁵Gwong gwa sé de mwat e bare gwa sé rwat, ko e yɛnɛ mo gwó tala na reku.

²⁶Cwey rê pyɛ́ ye sɛlɛ mwat e fwom, ye tɛ̀ a rimi hɛ e ra fwom o.

²⁷Mwât zɔng-reng e yong begwong beves, ko hâ nu mɛ ha sé sede lêm kya.

²⁸Mwât nenu-neba e shara yol, ko mwât ryɔgɔt e gas begbɔng besa.

²⁹Mwât yol e tɔgɔs mwât vwara mɛ, ko a kyè na yɛ e gwong de gwà sé naka wɛt.

³⁰Womo de e tē mwɛt à bayis, e doysa pyɛ́, ko womo de e tang nu, e mwât véy na neves.

³¹Shɔlɔ̂ rato ya sé kpin wo nerey, ya sé pyɔlɔ̂ bemat de ba sé cik.

³²Mwat de e ra shom ziri wɛt, a dal wo gap, ko mwat de e re negwɔm yey mɛ, a dal wo rê repomo e como.

³³Mwat e masa na begbɛrɛng, ko Dagwi Darwey pyɛ mɛ e de yɛrɛ.