Read berom Cīnat Neha 17 Bible Online

Cīnat Neha 17 - berom bible

Cīnat Neha 17

¹Nduga hwo re cɛk tuk na yey e dyɛngɛ, a dal pyɛ̂ nzem e lɔ de be ra yol.

²Sam wo netsitsɛng ê sɛ̀ reto e ra hwey de he ra pyɛ̂ rekyen, ko ê sɛ̀ numo mɛ hê nedanelɔ sede gwining e ji begwa mo.

³Bé mara dyam shinang na dyam pyɛng na kya, ko ano arɔng Dagwi Darwey e masa neyey.

⁴Mwat râ neves e wet betong na ha mwât banɛn, ko mwât kwɛlɛng e tɛ̀ nehywɛ mɛ e ra neha bɔs.

⁵Mwat de e shɛgɛsh pwɛng e byɛs mwat de a yong ɛ, mwat de e feng na gawêy gwa mɛ, bé tik nà tabak hɛ wɛt.

⁶Bemakuk be dak kaa na begal mɛn, ko nèy ne dak kaa na beda mɛn.

⁷Neha nerat na sé pyɛ na betɔn wɛt, ano neha bɔs na sé pyɛ na gwɔ̀m wɛt.

⁸Pyɛ bâng nu ya sé sede pyɛ bɛs e dî mwat de e nɔng, na a di wɛng e ra kayɛ pyɛ.

⁹Womo de e hala buru e jama tɛ̂ yey, ko womo de e hashe neha neroso e bidɛ besa.

¹⁰Gyong hé yél a mwat de a vɔk netsitsɛng, he dal dak tɔn na zining zang naga.

¹¹Mwat vwes e jama sogô nehywɛ, ko bê tomo tom vwes e ra yɛ.

¹²Nduga mwat a man na cwey de ba ga hashe a yɛ nèy, de hwo man na tɔn e ji neves mɛ.

¹³Mwat de a tala pyɛ́ ryat na pyɛ́ vyes, neves nê sang gas ɛ na belɔ mō wɛt.

¹⁴Pɛ́rɛ cuna ha sé sede kulu kwɔn de ba bang ɛ nshi, ano, rimi gyam yol ye sogo.

¹⁵Womo de a yang mwat vwes à wò necik na womo de a yâng wò necik a mwat vwes, mwa yɛn beba ba sé pyɛ byɛm-byɛm e nuyel Dagwi Darwey.

¹⁶A sé yapyi na tɔn a jut dyām a sey mɛ netsitsɛng, yaga a vɔk cwey masâ pyɛ́ wɛt.

¹⁷Sá e tɛ̀ yey kayɛ jeng, ko gwà a sé yaga jeng reyɔm.

¹⁸A sé mwat de vit a tɔ́k-tsik, de e vo nû tumal a mwât vwara mɛ e hwɔpɔ.

¹⁹Mwat de e tɛ̀ yey na banɛn e tɛ̀ yey na cuna, ko womo de e toros to, e yong gaba mɛ.

²⁰Mwat de yey mɛ ya sé kang-gang e re nuyel wɛt, ko mwât nenu-neba ê yel e ji reyɔm.

²¹Mwat de a tɔ tɔ̂n hwey pyɛ lashe yey ya ga sɛ̀ ɛ, ko dâ hɛ vit a hɛ na yey pyɛng.

²²Yey pyɛng ya sé hwal rwat, lashe yey he tɛ̀ nedem gbɛrɛk.

²³Mwat vwes e sey pyɛ bang nu e lɛrɛ, na a rigim mɛ gas badu e tē.

²⁴Mwât tɔ́k-tsik e tɛ̀ bayis e ra netsitsɛng, ko tɔn a sé kpɛɛ à hɛ.

²⁵Tɔ̂n hwey he vey a dâ hɛ na lashê yey, ko yey sit na neng tɔ mɛ.

²⁶Tɛ̂ mwât necik a tala pyɛ, a sé tyɛng wɛt, kɛ dâk bemat nuyel ha sé naka wɛt.

²⁷Mwât tɔk e nára há wɛt. Mwât tɔ́k-tsik e kaba to mɛ.

²⁸Ka tɔn a vɔk nu mɛ gak, bê jut ɛ mwât tɔk, jeng de a man nu mɛ, bê jut ɛ mwât netsitsɛng.