Read berom Cīnat Neha 18 Bible Online

Cīnat Neha 18 - berom bible

Cīnat Neha 18

¹Mwat de a kang ɛ, cwey pyɛ̂ yey mɛ zɔng de e simo, ko e tó cuna e ra kayɛ pyɛ de ya sé tyɛng.

²Tɔ́n pyɛ mɛ ya sé na tɔ́k-tsik wɛt, e dal simo a ha bare mɛ zɔng.

³Jeng neves ne vey, byɛs he vey arɔng, vît nɔng nerey, rekyen re yel.

⁴Neha nu mwat netsitsɛng na sé nshî ciwil, ne nɔng netsitsɛng sede rɔt he nɔng nshi.

⁵A sé tyɛng na mwât shɔt a dyɛng mā á mwat vwes, kɛ a romɛ a wò cik na gas shɔt e tē.

⁶Nû tɔn hé vey na cuna, he yila a yɛ dak.

⁷Nû tɔn he vey a yɛ na wey, ko neha mɛ na sé sede segun na yɛ.

⁸Neha mwat ryɔgɔt na sé sede pyɛ̂ re de ya ta, ne yel e ji rebek.

⁹Mwât neriri e fwom, gwà mɛ a womo de e wey na pyɛ́.

¹⁰Rezâ Dagwi Darwey ra sé gwotyɔ̌n gap, wò cik e tele wɔ e hwomo a sǎ tyang.

¹¹Nerêy mwât nedanerey ne a gap mɛ, na sé sede jwa-duk lwis de wo dul ɛ.

¹²Gyam wey he vey mwat e pɛrɛ tôs to, ko dyɛ̂ng to hé kyè vey na nɔng nerey.

¹³A sé netɔn na pyɛ rekyen, na mwat a toyo na ha, gyam e rɔngɔl na wok mwa há mo.

¹⁴Mwat de a vɔk yey e niri e ji serɔ, ko wà e tɔk sɛlɛ mwât yêy fɛgɛt ɛ?

¹⁵Mwat de a sé tsɛng-tsɛng e sɛ̀ tɔk, ko betong wo netsitsɛng be jama tɔk.

¹⁶Nɔ̂ng nɔrɔ he wunta a mwat gwong, ko he vey na yɛ e nuyel begbɔng bemat.

¹⁷Mwat de e tanga misang ha e duk shɔt, he sé sede e mwin, sɛ̌ jeng de sa mɛ a ra a yɛ nerangsal.

¹⁸Mása na begbɛrɛng he gas cuna ko he gas tê bemat de ba vɔk reto.

¹⁹Gwa de hwà lashe na yɛ e kang ɛ sede repomô dál, ko cuna ya vɔk gap sede kwɔrɔ̂ ri repomo.

²⁰Be tala hwo yi na hâ nu mō, ko pyɛ de ye nusu yi e bebɛrɛk mō yê sè pyɔlɔ mō.

²¹Reku na neken na sé e tô lem, ko vemo de be tɛ̀ yey na rɛ, bê sɛ̀ mɛ.

²²Mwat de a sɛ̀ hwā a ga sɛ̀ pyɛ ryat, Dagwi Darwey a ga dura a yɛ nerat mɛ.

²³Bepɛng be dak gabɔk yaga sɛlɛ, ko bedaberey be toyo na ha na yol.

²⁴Besa behak ba sé e bayis zɔng, ko sa mō hwak a sé de a sé pang na hwo, a dal gwa mo.