Read berom Cīnat Neha 19 Bible Online

Cīnat Neha 19 - berom bible

Cīnat Neha 19

¹A dal na mwat a sè pwɛng ko a sila gyat, e ra mwat de a vɔk nenu neba.

²A sé naka na mwat a sè sana tɔ́k wɛt, mwat de e ra nefufǔl e rà pyɛ́, ê bidɛ buru wɛt.

³Netɔ̌n mwasi ne wey na begwong mɛ, e rá shom na Dagwi Darwey.

⁴Nedanerey ne vey na besa pyak, ko mwat pwɛng besa mɛ be ye zak a hɛ.

⁵Mwât nuha bɔs e hywit a tabak wɛt, ko womo de e bere nebɔs bê tik ɛ nà tabak wɛt.

⁶Bemat pyak be simo be sɛ̀ somo na mwat nuyel, ko kawɛ mwat a sé sa na mwât nɔngɔs nenɔrɔ.

⁷Mwa câng mwat pwɛng be bɛɛ hé ves, tàga besa de ba sé yikyik na yɛ! E raa hɛn na neha mɛlɛm ko e ka sɛ̀ to mɛn wɛt.

⁸Yɛ de e sɛ̀ netsitsɛng e tɛ̀ yey na to mɛ, yɛ de e gyeng tɔk ê re nuyel.

⁹Mwât nuha bɔs ê kyè sana tábak wɛt, ko yɛ de e yɛt nebɔs ê wey.

¹⁰A sé tyɛng na tɔn a sangal e ji wok neta wɛt, taga sam a re negwɔm e ra bemât nuyel.

¹¹Vɔ̂k tɔ́k-tsik he tɛ̀ mwat a ra shom ziri wɛt, ko a sé pyɛ nerey na yɛ a hala buru.

¹²Shôm gwɔ̀m ya sé sede lúlum gukum, ko e ra mwat, nerat mɛ na sé sede mwɛngɛ e ra sɔng.

¹³Tɔ̂n hwey ha sé pyɛ wey na da mɛ, ko hwā de a kat nu a sé sede rwâk kpam-magèy.

¹⁴Lɔ na nedanerey be re yi na beda, ko hwâ netsitsɛng a sé yi na Dagwi Darwey.

¹⁵Neriri ne tɛ̀ a hwo nevwâ reku, ko mwat de e sangal bɛs ê re vyong.

¹⁶Wo gyeng badu, wo gyeng neken mō, wo byɛs ha ê ku vwen.

¹⁷Mwât wok nemwishish bepɛng a sé nɔngɔs hwɔpɔ vɔk na Dagwi Darwey, ko Dagwi ê tala hɛ yaga tomong mɛ rat.

¹⁸Tabak hwey mō e jeng de sɛ̂t yey ha sé e ra yɛ, ko hwo kwon jut na shom sede hwô mɔrɔ hɛ wɛt.

¹⁹Mwat de a kat shom ê tala byɛ mó, yaga ka hwà sey ɛ, hwô to ra ano gbak.

²⁰Wet betong na vô redu na hwo sey basa, na hwo bin sɛ̀ netsitsɛng e nuyel.

²¹Begwông yong pyɛ́ ba sé pyak e barê yey mwat, ko pyɛ́ de Dagwi Darwey a simo, e yɛ̄ yê tumal ting.

²²Pyɛ de be simo na mwat, yɛ a tsak tɛ̂ yey, ko mwat pwɛng, a dal mwât yɛt nebɔs.

²³Sâp Dagwi Darwey he kyè na mwat wɔ e neken, ko womo de a vɔk hɛ, ê sangal vit a pyɛ vyes de yê ra ɛ.

²⁴Riri e tɛ̀ vwɔ mɛ e shǐ, ko e ka tɔk vɛ pyɛ́ vɔk e nu wɛt.

²⁵Fala mwât byɛs, ko betɔn bê masa netsitsɛng, gyong mwât tɔ́k-tsik, ko ê sɛ̀ tɔ́k.

²⁶Hwey de he dak dâ hɛ na he ro neng mɛ, he vey na rekyen.

²⁷À hwey hom, sede hwà wok gyong wɛt, hwô ye rɛng yi e neha tɔ́k.

²⁸Mwat nuha bɔs e tɛ̀ duk shɔt wo tɛ́ ɛ pyɛ shɛgɛsh, ko nû mwat vwes he simo banɛn sede be wɔ̀lɔk tuk.

²⁹Tábak ha sé yaga bemat de ba vɔk byɛs, ko zining yaga dâk mǎ betɔn.