Read berom Cīnat Neha 2 Bible Online

Cīnat Neha 2 - berom bible

Cīnat Neha 2

¹À hwey hom, sey neha hom vɔk gak pyɛ de ma nɔng o nu.

²Wet betong naka e ra netsitsɛng tɛ̀ yey e sɛ̂ tɔ̂k pyɛ́.

³Ra won yaga tɔ̂k pyɛ́, yila na gbɔng fwɔ yaga vɔ̂k tɔ́k-tsik.

⁴Jama nɛ sede dyam pyɛng ko ngyɛgɛt nè sede yas de ya sé e lɛrɛ.

⁵Ka sede hwà ra ano, hwô sap Dagwi Darwey, hwô sɛ̀ tɔ̂k Dagwi.

⁶A sé Dagwi de e nɔngɔs netsitsɛng, yi na yɛ be vɔk tɔk na tɔ́k-tsik.

⁷E tula netsitsɛng nerat yaga vê necik, a sé ruga na vemo de be sila gyat.

⁸E kyè na yɛn e begwong de ba sé cik, e gyenges gwòng vemo de ba sè pang na yɛ.

⁹Ano yɛn ê tɔk necik na gas badu e tē, na bare rat, na kagwɛ gwong de gwa sé naka,

¹⁰netsitsɛng nê yel e ji yey mo, ko tɔk hê sè a hwo netyang e sangal mo.

¹¹Nehywɛ é ha nê gyeng o, ko tɔ́k hê dul o.

¹²Hê sey o yi e gwong vwes, hê dul o yi na bemât nenu-neba,

¹³vemo de ba ga hala begwong berat, na be kyè e begwông lwil,

¹⁴vemo de ba vɔk yey pyɛng e ragas pyɛ́ vyes, ko be feng e ra bɔs,

¹⁵vemo de begwong mɛn ba sé gwɔrɔdɔk, ko ba vɔk nenu neba.

¹⁶Netsitsɛng nê sey o yi e hwâ nejwang, yi na hwā duk, na hâ mɛɛsɛs mɛ,

¹⁷de a hala weneng na rwâs negel mɛ, a ye bam à wuna-na-sira mɛ e nuyêl Dagwi,

¹⁸ko gwong vɔk e lɔ mɛ gwa sé gwong vɔk e reku, kwɛngɛl vɔk e hwomo gwa sé vɔk e kwɔn bevuvwel,

¹⁹vit a mwat de e wɔ na yɛ na a to sè e ji bemat, kɛ a toyo e gwong neken.

²⁰Ano, kyè e gwong bemat berat, na hwo raa begwông vê cik.

²¹Vê sila gyat bê re nedanelɔ vwel o, ko bemat tsak o bê nàra e vwel o.

²²Ko bemat beves bê pat ɛn yi e hɛ, vê kwɛlɛng bê luyu hɛn yi e hɛ.