Read berom Cīnat Neha 20 Bible Online

Cīnat Neha 20 - berom bible

Cīnat Neha 20

¹Siring wo tɛ̀ a mwat shɛgɛsh byɛs na râ yol, mwat de siring wa tɛ̀ ɛ a ye rɛng a sé tɔn.

²Shom pyep gbɔng gwɔ̀m ya sé sede lúlum gukum, kawɛ de a tɛ̀ ɛ a wok shom e bidɛ neken mɛ.

³A sé pyɛ nɔ̂ng nerey na mwat a tele hɛ yol, ko kawɛ tɔn e simo tô cuna.

⁴Riri e how cap naswigi wɛt, e masa yis nahywɛp vit a pyɛ.

⁵Barê mwat hwak ha sé ciwil sede gworep, ko mwât tɔ́k-tsik ê pat hɛ yi e yey mɛ.

⁶Bemat pyak be ha e ra tsak tɛ̂ yey mɛn, ko mwât tsak o, wà e tɔk sɛ̀ ɛ arɛt?

⁷Mwât necik de e kyè e gwong tyɛng, nèy mɛ nê sè vê wɛng.

⁸Gwɔ̀m e ra gwofwa shɔt, a tɔk gas pyɛ vyes na yat o.

⁹Wa ê tɔk ye, “Ma ga tɛ̀ yey hom haalal, ma sé jɛkjɛk yi e banɛn hom a?”

¹⁰Pyɛ̂ masa yê mɔt na yê kwɛlɛng, mwa yɛ ya sé pyɛ̂ byɛm-byɛm e nuyel Dagwi Darwey.

¹¹Ka hwêy mwa, be tɔk hɛ yi na tomông hɛ, sede negwɔn hɛ na sé naka na sé cik arɔng.

¹²Betong wok na bayîs bɛrɛng, Dagwi Darwey a ga yong vɛ mwa.

¹³Hwó simo wɔ̂ nevwa, hwô ba tɛ́ o pwɛng, sogo, na hwo ra fwom, ko hwô vɔk pyɛ̂ re pyak.

¹⁴Mwât sey e tē, “Ya sé ryat wɛt ya kat dyām!” ko jeng de a ga sey, e dak kaa wɔgɔ ya sé lɛgɛm.

¹⁵Dyam shinang ya sé, na dyengerê dyām pyak, ko nû tɔk ha sé dyéngere ryat sizɔng.

¹⁶Mwat winde e vo nu na a tumal a kwɛnɛt e hwɔpɔ, gbing-gbing na be vɔk pyɛ́ mɛ e selek sɛ̌ jeng de ba tala badu mo.

¹⁷Pyɛ̂ re de mwat a sɛ̀ e gwông kwɛlɛng ye ta, ko e bama jeng nu mō he tangal bazɛk.

¹⁸Kayɛ pyɛ yong de bé vo ɛ redu ye ta to, na myak mwât netsitsɛng hwô to como.

¹⁹Yɛ womo de e kyě ra ryɔgɔt, e paa nesang, yaga ano hwo ra nesa na yɛ wɛt.

²⁰Sede mwat e mok a da mɛ kɛ neng mɛ gawey, bê rimi kywa-kya neken mɛ ko ê sè e lwil tíbit.

²¹Pyɛ̂ nedanelɔ de ba pere sɛ̀ dey-dey e susu mo, e yɛnɛ mo ye vɔk nerat wɛt.

²²Hwo kwon ye wɛt, “Mê tala neves”, tik a Dagwi Darwey, ko yɛ ê sɛlɛ hwo.

²³Dagwi Darwey e simo bemât mɔt e masâ pyɛ́ wɛt, ko pyɛ̂ mwa yê bɔs ya sé pyɛ̂ byɛm-byɛm na yɛ.

²⁴Kwɛngɛl mwat gwa sé yi na Dagwi Darwey, ko yi e rɛ̌ de mwat ê tɔk gwong mɛ ɛ?

²⁵A sé segun na mwat a ha vòrot: “A sé pyɛ jɛrɛ”, na a de bare e bama de a ga vo nu.

²⁶Gwɔ̀m de a vɔk netsitsɛng e tabak bemat beves, sede be wolom pyɛ̂ yeneng.

²⁷Gabik mwasi à kywa-kya e vwɔ̂ Dagwi Darwey, e jut hɛ na a jama báre de ha sé e ji mɛ.

²⁸Tsak tɛ̂ yey na tsak o ne gyeng gbɔng gwɔ̀m, ko gap gwofwa sangal mɛ à tsak tɛ̂ yey.

²⁹Nerêy bebot bemat à gap mɛn, ko pyɛ kaà bemakuk à shɔlɔ.

³⁰E dák de he yishing mwat yi e neves, ko zining wo tɛ̀ ɛ e jimo-jimo haalal.