Read berom Cīnat Neha 21 Bible Online

Cīnat Neha 21 - berom bible

Cīnat Neha 21

¹Yêy gbɔng gwɔ̀m ya sé e vwɔ̂ Dagwi Darwey, e doyo yɛ sede rɔt e kagwa de e simo.

²Kagwɛ gwông mwasi gwa sé tyɛng e di mɛ, ko Dagwi Darwey e masa neyey.

³Râ necik na gâs badu e tē, Dagwi Darwey e dal na sêy yɛ e ra yas rangas.

⁴Paà kwas na dâk gey, e kywa-kya bemat beves, ya sé banɛn zɔng.

⁵Pyɛ de mwât tē ngyɛ́k e ra, ye vey na nedanerey pyak, ko mwât cwey nedanerey dey-dey e bidɛ.

⁶Sɛ̂ nedanerey na nû nebɔs ha sé pyɔlɔ de ye kwey ziri sede sekyeng, ha sé sòro reku.

⁷Yol bemat beves yê yishing hɛn e majey, yaga ba kyɛ́ ɛn nà ra pyɛ de ya sé tsak o.

⁸Gwông mwat de a vɔk nɛn gwa sé gwɔdɔrɔk, ko negwɔn mwat de a sé haalal na sé tyɛng.

⁹A dal na mwat a sangal nju mɛ e kwɔn de ha mak sé rat wɛt, de a sangal e lɔ na hwā de e shɔk jim.

¹⁰Neyey bemat beves na vɔk cwey banɛn, ko be di nemwishish mwat vwara mɛn wɛt.

¹¹Jeng de be tabak wo byɛs, vê dunus be tɛ́ ɛn vê netsitsɛng, jeng de ba basa a mwât netsitsɛng, e sɛ̀ tɔ́k.

¹²Dagwi wo necik e bɛrɛng lɔ mwat vwes wɛshɛrɛk, na a di ha wey.

¹³Mwat de a bang betong na sîn mwat pwɛng, yɛ pyɛ mɛ ê tosho, ko bê wok ɛ arɔng wɛt.

¹⁴Nɔ́rɔ e lɛ́rɛ he ye rɔ̀s à shom, ko nɔ̂ng pyɛ bang nu e gunung ye dyɛng shom pyep.

¹⁵Jeng de ba gas shɔt e tē, e sè pyɛ yey pyɛng na vê cik, ko e sè pyɛ yɔɔtɔt na bengyip na vê ragas banɛn.

¹⁶Mwat de e tē wek e gwông tɔ̂k pyɛ́ ê pɔnglɔ e kwɔ̂n tulâ bavin.

¹⁷Mwât kat simô wok neta ê tɛ́ ɛ pwɛng womo de e simo nshi anap na něy ê tɛ̀ nedanerey wɛt.

¹⁸Mwat vwes a sé pyɛ virî wo cik, vê ra tsak o wɛt ba sé yaga vê sila gyat.

¹⁹A dal naka mwat a sangal e tê hêy gbingiring, de a vɔk hwā de a kat shom na hâ shɔk jim.

²⁰Pyɛ́ ryat de hwó bang, yé nàra e kwɔ̂n sangal wo netsitsɛng, ko tɔn e wɔlɔk yɛ.

²¹Mwat de e raa necik na dura nerat, ê sɛ̀ neken na gbɔng nerey.

²²Mwat gwining wo netsitsɛng e re repomo de ra vɔk bemat como pyak, ko a gangas vwara de gwa dul repomo mo.

²³Womo de e gyeng nu mɛ na lem mɛ, e dul tó mɛ yi e reyɔm.

²⁴Mwât dak kaa na paà kwas be yila hɛ a mwât byɛs, womo de e ra pyɛ́ na tos to na netset.

²⁵Simô cwey pyɛ́ he wey na riri, yaga vɔ mɛ be kyɛ́ ɛn râ fwom.

²⁶Mwa woshô mwat vwes e sǎ e de marâ yis, ko wo cik e nɔng, e gunung vwɔ wɛt.

²⁷Nenɔrɔ̂ rangas yas wo neves na sé pyɛ byɛm-byɛm, taga a vey na nɛ na bare ves.

²⁸Mwât nuha bɔs ê wey, ko hâ mwat de e wok hê nàra.

²⁹Mwat vwes e dura sede a sé mwat rwat, ko womo de a sila gyat e bare begwong mɛ kayɛ jeng.

³⁰Vit a netsitsɛng, vit a tɔ́k, vit a redu, de ha vɔk sɛlɛ e repugu na Dagwi Darwey.

³¹Bé yong bedwa yaga tuk como, ko wɛng ha sé yi na Dagwi Darwey.