Read berom Cīnat Neha 22 Bible Online

Cīnat Neha 22 - berom bible

Cīnat Neha 22

¹Kasâ reza rerat ra dal sɛ̌ yas pyak, ko nemi nepɛng na dal dyam pyɛng kɛ dyam shinang.

²Darwey na pwɛng be man, ko e Dagwi Darwey de a yong ɛn mwa.

³Mwât nehywɛ e di galumla ko a lɛrɛ tó mɛ, ko vê dunus be rimi hɛn ko be sɔ reyɔm.

⁴Pyɔlɔ yaga dyɛ̂ng to na bengyip Dagwi Darwey, ya sè yas, na nerey tanga neken.

⁵Serogo na segun ba sé e gwông mwât kwɛlɛng, mwat de e gyeng to mɛ e sè yikyik na yɛ̄.

⁶Masa a hwey gwong de ê raa, ko jeng de a kwop ê ye bam a gwɛ wɛt.

⁷Darwey e re negwɔm e ra pwɛng, ko mwât hwɔpɔ a sé sam womo de a hwɔp ɛ.

⁸Mwat de a tus neves ê yɛt bwâl rezot, ko gwelê shom mɛ gwô radɛ.

⁹Mwat de a vɔk yêy toshô reyɔm bê tɛ̀ a yɛ nerat, yaga e gas pyɛ́ mɛ na bepɛng.

¹⁰Pat mwât byɛs, ko yol yê tala hɛ, cuna na dusa bê sè wɛt.

¹¹Wo simô yêy haalal na wo neha nerat, gbɔng gwɔ̀m ê sè sā mɛ.

¹²Bayîs Darwey be gyeng womo de a vɔk tɔ́k, ko e basak neha mwât kwɛlɛng.

¹³Riri e ye, “Gukum wa sé e majey, wô wey na me e gwong!”

¹⁴Nû jwâng hwā ha sé vɔng ciwil, womo de Dagwi Darwey e wok shom me ê gaba e hɛ.

¹⁵Netɔn na sé e yêy hwey, ko tabak na gwele hé ro nɛ yikyik yi na hɛ.

¹⁶Mwat de e ták a bepɛng na a gwɛ mɛ yas mɛ, kɛ e nɔngɔ̂s bedaberey nerey, ê ba tɛ́ ɛ pwɛng.

¹⁷Wet betong mō, na hwo wok neha vê netsitsɛng, ko hwo tɛ̀ yey mō na basa hom,

¹⁸yê sè a hwo yey pyɛng sede hwà gyeng yɛ̄, sede mwa yɛ ya sé e nu mō.

¹⁹Na gap mō he bin sè e ra Dagwi Darwey, ma ga tɛ̀ hwo tɔk nɛ yunung, ey, ka hwo mwa.

²⁰Ma ga jɛ́k a hwo neha kuru batat nerey o, nè gyong na tɔ́k,

²¹nê dura a hwo pyɛ de ya sé tyɛng, na tsak o, hwo bin nɔng tsak hanat na vemo de ba tomo hwo.

²²Hwo kwon sey ɛ pyɛ pwɛng, yaga a sé mwat pwɛng, kɛ hwo midra vemo de vit a hɛn na sɛlɛ,

²³yaga Dagwi Darwey ê tumal a yɛn, ko ê ye mak a vemo de ba ye mak a bepɛng.

²⁴Hwo ra nesa na mwat de a vɔk shom ziri, kɛ hwo kyè na mwât yey pep wɛt,

²⁵yaga hwô kwon masa negwɔn mɛn, na hwo hanas to mo e ji soro.

²⁶Hwo kwon sè gwining e ji vane de be vos nu wɛt, vê tumal a bemât hwɔpɔs.

²⁷Ka sede hwà vɔk pyɛ tala wɛt, bê sey ɛ gwât dyɛngɛ mō.

²⁸Hwo kwon sek tô cap hê raane wɛt, de bedabeda bá tɛ̀.

²⁹Hwó bɛrɛng mwât sekwɛl e fwom mɛ re? Ê ra fwôm begbɔng begwɔ̀m, ê ra fwôm bepɛng wɛt.