Read berom Cīnat Neha 23 Bible Online

Cīnat Neha 23 - berom bible

Cīnat Neha 23

¹Jeng de hwà sé sangal na hwo re pyɛ́ tanga bemât nuyel, bɛrɛng naka pyɛ de ya sé e nuyel mō.

²Sede hwà sé mwât rwéy hyùu, té naka na hwɔ́k mō.

³Hwo kwon vɔk cwey pyɛ̂ halang mɛ wɛt, yaga ya sé pyɛ̂ re yê kwɛlɛng.

⁴Hwo mɔrɔ bek mō e râ fwom na hwo sɛ̀ nedanerey wɛt, tɛ̀ netsitsɛng na hwo tik ra ano.

⁵Sede bayis mō ba di nedanerey na ga kyè, sede nà vɔk bafabak na sogo na tele, sede gwakim vɔk e lagwi.

⁶Hwo kwon re pyɛ̂ mwât shwey, kɛ hwo wok cwey pyɛ̂ halang mɛ wɛt,

⁷sede remo de e bare e yey mɛ, e tang o, “Re na hwo sɔ!” Ko yey mɛ ya sé na hwo wɛt.

⁸Hwô hwɔs pyɛ́ de hwà ga re, neha mō nerat na ga wey ɛ.

⁹Hwo kwon ha há e wokos tɔn wɛt, yaga ê byɛs netsitsɛng neha mō.

¹⁰Hwo kwon sek tô cap raane, kɛ hwo yel e cap nehyɛn wɛt,

¹¹yaga mwât sey mɛn a sé Dagwi wo gap, ê tumal a yɛn.

¹²Tɛ̀ bare mō e jamâ basa, ko betong mō e ra wôk há.

¹³Hwo kwon tik nà tabak hwey wɛt. Sede hwà dak hɛ na gwele, hê ku wɛt.

¹⁴Sede hwà dak hɛ na gwele, hwô sey neken mɛ yi e bevuvwel.

¹⁵À hwey hom, sede netsitsɛng na sé e yey mō yey hom yê pɛngɛ arɔng.

¹⁶Yey hom yê pɛngɛ jeng de nu mō he ha pyɛ de ya sé tyɛng.

¹⁷Hwo tik yey mō ye bɛɛ bemât ragas banɛn ves wɛt, ko re nuyel na sâp Dagwi Darwey mwa wosho.

¹⁸Mwin jeng yat ye kyè vey, ko sɛ̂t yey mō hê dul hɛ wɛt.

¹⁹Wok, à hwey hom, vɔk netsitsɛng, ko tɛ̀ bare e ji gwông cik.

²⁰Hwo kwon wuna to mo na bemat de ba kat sɔ̂ siring, kɛ bemat de ba kat cɛ̂s banama,

²¹yaga wo sefeng na wo rê pyɛ́ datdat bê tɛ́ ɛn bepɛng, nevwa nê vos ɛn, ko jeng tyɔng yɛn e tɛ̀sɛ cɛk berugu.

²²Wet betong na hâ da mō, womo de a tɔ o, ko hwo byɛs neng mō wɛt jeng de a ga kwop.

²³Sey tsak o, hwo row wɛ wɛt, sey netsitsɛng na basa tanga tɔ́k-tsik.

²⁴Dâ hwêy necik e vɔk yey pyɛng sizɔng, womo de a vɔk hwêy netsitsɛng e dak kaa e ra hɛ.

²⁵Tik da mō na neng mō be vɔk yey pyɛng na hwo, ko tik nêng tɔ mō a dak kaa na hwo.

²⁶À hwey hom, nɔng me yey mō, ko tik na bayis mō be bɛrɛng begwong hom.

²⁷Devwes a sé sede revɔng ciwil, ko hwā duk a sé sede hwês nengyɔgɔdɔk.

²⁸E wɛrɛm e waba sede gbik, ko e gwɛsɛ ɛ beras de vit a tsak o.

²⁹E wa na gawey ɛ? E wa na yey sit ɛ? E wa na cuna ɛ? E wa na gwɔrɔng ɛ? E wa na baram sana tin ɛ? E wa na bayis basinang ɛ?

³⁰E womo de e ros e de sɔ siring, e rɔnɔs e de jama sirîng púru.

³¹Hwo kwon bɛrɛng siring wɛt, jeng de wo paa cúyu e keshi, wó gyiris wirititit e fwɔ.

³²E tala mō wo roros sede gwɔ̄m, ko wo tabas sede gàbak.

³³Bayis mō bê bɛrɛng pyɛ́ dyuk, hwô yɛt neha kpɛɛ e yey mo.

³⁴Hwô sè sede mwât dyɛngɛs e dwa-nshi e tê gworep, hwô kyè ra detangalang sede gul gwo pɛsɛl hwo.

³⁵Hwô ye, “Yɛn a gang me, ko ba mǎ me wɛt, yɛn a dak me, ko ma wok pyɛ wɛt. E yɛ̌ jeng mê sene ɛ? Mê jama pyɛ sɔ cak.”