Read berom Cīnat Neha 24 Bible Online

Cīnat Neha 24 - berom bible

Cīnat Neha 24

¹Hwo kwon bɛɛ bemât banɛn ves, kɛ hwo vɔk cwey sangal tanga yɛn,

²yaga yey mɛn yɛ jama yol, kayɛ jeng de yɛn a wunta nu mɛn, sɛ̌ yɛn a mǎ mwat hwak.

³Yi na netsitsɛng be lɔk lɔ, ko yi na sekwɛl de be tɛ̀ retis hɛ,

⁴yi na tɔ́k beduk o ba sila na mwa pyɛ́ ryat yê neta.

⁵Mwât netsitsɛng a dal mwât gap, ko mwât tɔ́k a vɔk reto,

⁶yaga yi na kyê netsitsɛng hwó yel e tô como, e ji regyɛng bemât vos badu wɛng he sè.

⁷Netsitsɛng na sé a tɔn yikyik, vit a yɛ na nû hanat e duk shɔt.

⁸Womo de e yongos neves, bê yila hɛ a mwât nengyas.

⁹Pyɛ de tɔn a yong ya sé banɛn, ko mwât byɛs a sé pyɛ byɛm-byɛm na bemat.

¹⁰Ka sede hwà tɛ́ o gbɛrɛk e tuk reyɔm, sɛ̌ hwà sé gbɛrɛk mwin.

¹¹Sey vemo de ba kyè na yɛn wɔ e reku, toyo na vemo de be tíi bol wɔ e kwɔ̂n yɛrɛ.

¹²Sede hwà ye “Mwin, nu mot ha sé ɛ wɛt”, yɛ̀ wo masa neyey a di wɛt a? Womo de e bɛrɛng neken mō a tɔk, ko ê tala mwat tyɛng na fwom mɛ wɛt a?

¹³À hwey hom re shok, yaga ya sé naka, ko nshi de ne tɔngɔt yi e hamal shok né ta e nu mō.

¹⁴Tɔk wɔgɔ netsitsɛng na sé ano na neken mō, sede hwà sɛ̀ ne, nerat nê sè e nuyel, ko sɛ̂t yey mō hê gas ɛ wɛt.

¹⁵Hwo dyɛng e lɛrɛ sede mwat vwes de e ra repugû kwɔ̂n sangal wo cik, kɛ hwo ra yol e ra lɔ mɛ wɛt,

¹⁶yaga wo cik e gaba zang taama ko zang taama a sè sogso, ko beves, reyɔm rê kyira hɛn.

¹⁷Hwo kwon vɔk yey pyɛng jeng de wo repugu mō a gaba, kɛ hwo tik yey mō ye feng jeng de e tíi bol wɛt,

¹⁸ka Dagwi Darwey a di, ko e doyo shom mɛ vey na hwo.

¹⁹Hwo tik yey mō ye bɔrɔk hɛ yaga bemat beves wɛt, ko hwo kwon ra repugu na bemat beves wɛt,

²⁰yaga mwat vwes vit a yɛ na sɛt bayis e nuyel, kywa-kya mwat vwes gwô rimi hɛ.

²¹À hwey hom sap Dagwi Darwey na gbɔng gwɔ̀m, ko hwo kwon byɛs hwak mɛn wɛt,

²²yaga yɛn ê tɔk wey na mwat hák, ko wa e tɔk neves de ne vey yi na yɛn ɛ?

²³Nemo na sé neha vê netsitsɛng arɔng; Simô to e shɔt ha sé naka wɛt.

²⁴Womo de a yang mwat vwes, “Vit a hwo na nɛn”, bemat bê mok a yɛ gawey, yere bemat jey bê wok nebyɛm-byɛm mɛ,

²⁵ko vemo de be gyong mwat vwes, bê vɔk yey pyɛng, ko nerat nê sè e ra yɛn.

²⁶Womo de e hanat tyɛng a sé sede sa de a kula hwo.

²⁷Yong fwom mō gyat e cap, sɛ̀ kayɛ pyɛ e yong yaga cwɛl mō, e bama mo hwo lɔk lɔ mō.

²⁸Hwo kwon nɔng nuha e ra mwât vwara mō vit a retin, kɛ hwo kwɛlɛng na nu mō wɛt.

²⁹Hwo ye wɛt, “Mê ra a yɛ sede a ra a me, mê tala mwat o yaga pyɛ de a ra a me.”

³⁰Ma kwey e cwɛ̂l riri, e bwî anap mwat de vit a to,

³¹ko sɛ́ ɛ? Gwa sila na serɔgɔ, sɔng gwa bang vwel o, ko beta jwâ-bwi mó ba ga gabsa.

³²Ano ma di ko ma bare pyɛ mo, ma bɛrɛng ko ma masa pyɛ cak.

³³Nɔ̀t ɛ nevwa, na tē gumat tyɔng, gunung vɔ mo na hwo pɔnglɔ tyɔng,

³⁴ano nepɛng nê hwo e ra hwo sede gbik, ko nevit sede mwât como.