Read berom Cīnat Neha 25 Bible Online

Cīnat Neha 25 - berom bible

Cīnat Neha 25

¹Cīnat neha Sɔlɔmɔn nehak a nemo de bemât Hɛzɛkiya, gbɔng gwɔ̀m Yuda ba tula.

²Gbɔng nerey Dagwi ne à lɛ́rɛ pyɛ́, ko nerey begbɔng begwɔ̀m nè a kúlu pyɛ́.

³Sede hâ nelis sě lagwi, ko neciwil sě jey, ano yêy begbɔng begwɔ̀m, be tɔk ngyɛgɛt yɛ wɛt.

⁴Pat serwik yi e ji dyam pyɛng, ko zu a vɔk pyɛ́ yông neshǐ pyɛ̂ re.

⁵Pat mwat vwes yi e nuyel gbɔng gwɔ̀m, ko gwofwa negwɔm mɛ gwô se tɛ̂ retis e ra necik.

⁶Hwo kwon jut to mō mwat rwey e nuyel gbɔng gwɔ̀m, kɛ hwo tumal e dem bemat berey wɛt.

⁷A dal na be yang o, “Vey bagat na gwɔ̀m” de bê yang o, “Sogo yi e ngamo.”

⁸Hwo kwon tele wô tɛ̂ sekun wɛt, e sɛ́ de hwô ra e yɛnɛ mo, jeng de repugu mō ra tɛ̀ o e ji rekyen ɛ?

⁹Tɔrɔng há mō tanga mwat vwara mō mo, ko hwo kwon kulu pyɛ neyaang mwat hwak wɛt,

¹⁰ka ano wɛt ko womo de e wokos hwo ê vey a hwo na rekyen, ko reza mō reves rê nàra vit a yɛnɛ.

¹¹Há tyɛng e jeng, ha sɛ́ sede pyɛ de ba wɔrɔ na wɔnɔ dyam shinang, de ba tik e ji dyam pyɛng.

¹²Sede yɔbɔ̂ dyam shinang kɛ pyɛ de ba tɔrɔ na dyam shinang, à mwât gyong wo netsitsɛng vɔk na mwat de e wok ha.

¹³Sede wût nemuk fwala e jeng hywɛp, ano de tom tsak o a sé na vemo de ba tomo hɛ. E tɛ̀ yêy dalɔ mɛ ye sɛ̀ wɛng-wɛng.

¹⁴Mwât dak kaà râ nɔrɔ, ko vit à nɔng, a sé sede bale na gul, ko vit a rwak.

¹⁵Dâk yey na niri hê sege barê gwɔ̀m, ko lêm há, hê tɔk kwɔrɔ kup.

¹⁶Sede hwà sɛ̀ shok, sɔ pyɛ de yê vey a hwo, hwo kwon sɔ yē dal gap wɛt, yaga hwô de hwɔs.

¹⁷Hwo dop e lɔ mwat vwara mo wɛt, ka ano wɛt ê ruru na hwo, ko ê bɛ̀ɛ hwo ves.

¹⁸Mwât nuha bɔs e ra mwât vwara mɛ, a sé sede kpurung, kɛ wal, kɛ kwêt myol.

¹⁹Tɛ̂ gap e ra mwat de vit a tsak o e jeng reyɔm, ha sé sede hwin vwes, kɛ bwol de gwa sé jógodok.

²⁰Rá a mwat de e lashe yey lwɛlɛ ha sé sede hywɛrɛm hɛ e jeng de jey ya sé ceere, sede nevwashe e ra ram.

²¹Sede mwat repugu mō e wok vyong, nɔng ɛ pyɛ́ na a re, ko sede e wok yêy hwɔshɔ, nɔng ɛ nshi na a sɔ.

²²Hemo hê tɛ̀ cilâ kya e ra to mɛ, ko Dagwi Darwey ê tala hwo pyɔlɔ mō.

²³Gûl rwa bato gwo vey na rwak, ko mwât ryɔgɔt e vey na shom.

²⁴A dal naka mwat a sangal nju mɛ e kwɔn de ha mak sé rat wɛt, de a sangal e lɔ na hwā de e shɔk jim.

²⁵Sede nshî ceere na mwât yey hwɔshɔ, ano yɛgɛt yat yi e repomô yikyik.

²⁶Sede hwês nshî ruguduk kɛ lwêl nshi neves, a sé ano na wo cik de e nɔngɔs to mɛ e nuyel mwat vwes.

²⁷A sé naka na hwo sɔ shok pyak wɛt, kɛ simo nerey kayɛ jeng wɛt.

²⁸Mwat de e rɔgɔs yey wɛt, a sé sede repomo de jwâ rɛ wa ga gabsa.