Read berom Cīnat Neha 26 Bible Online

Cīnat Neha 26 - berom bible

Cīnat Neha 26

¹Sede wut fwala nazɛng kɛ rwak e jêy hywɛp, ano nerey na jam yaga tɔn wɛt.

²Sede wǔtut e de rini, sede kenon de ke sogo gbir, ano gawey de vit a retin.

³Zining wa jam yaga dwa ko nerwey na jam yaga madung, ko gwele yaga mâ tɔn.

⁴Hwo kwon hanat a tɔn tyɛng na netɔn mɛ wɛt, ka ano, hwô sè sede yɛ.

⁵Hanat a tɔn tyɛng na netɔn mɛ, ano ê jut to mɛ sede a vɔk netsitsɛng.

⁶Mwat de e tomsal tomo e vwɔ̂ tɔn, a sé re tô bol mɛ ko e sɔ reyɔm.

⁷Cinat ha e nu tɔn ya sé vit a gap sede bwôl guruk.

⁸Sede mwat a rɔgɔs gwofwa e gazik, a sé sede mwat de e nɔngɔ̂s tɔn nerey.

⁹Sede serɔgɔ de he yel tsik e vwɔ̂ mwat de a ga feng siring, ano de cinat há e nû betɔn

¹⁰Sede mwat tabas gbang de e mǎ kawɛ mwat, ano na mwat de a jut tɔn kɛ wo sefeng na a nɔng ɛ fwom.

¹¹Sede vu de wa to re hwɔ̂s wɛ, ano na tɔn de a to ra netɔn mɛ.

¹²Hwó bɛrɛng mwat de e di to mɛ a vɔk netsitsɛng re? Sɛ̂t yey ha sé na tɔn e ra yɛ.

¹³Riri a ye, “Gukum wa sé e gwong! Gukum wa sé e nehyok!”

¹⁴Riri mwat e doysa kòng-gong e ra gwat, sede mǎ dyam hagât rwi duk.

¹⁵Riri e tɛ̀ vwɔ mɛ e shǐ, ko e wok negbang pat gwɛ vɔk e nu.

¹⁶Riri e di mɛ a dal na netsitsɛng, a dal bemat betaama de be tɔk hanat na nehywɛ.

¹⁷Mwat de e yeles e cɛk de ya sé myɛ wɛt, a sé sede mwat de a sé kaba betong vu de wa tɔk ɛ wɛt.

¹⁸Mwat lolong e tabas ket cila kya kpɛɛ, be mɔrɔ mwat,

¹⁹ano, mwat de e kwɛlɛng mwât vwara mɛ, ko a de ye, “Ma ra jɔgɔ zɔng!”

²⁰Sede vit a cɔgɔt e kya hê ku ko sede vit a mwât ryɔgɔt, tôw nu he dyɛng.

²¹Sede hwalang kɛ cɔgɔt e cilâ kya, ano mwât cɛk e tɛ̀ yol.

²²Neha mwat ryɔgɔt na sé sede pyɛ̂ re de ya ta, ne yel e ji yey.

²³Hâ mɛɛsɛs e nu ko yey vyes, a sé sede rwêy bwɔs de ba mɔmɔ na beving dyam pyɛng.

²⁴Mwât bɛɛ ves a vɔk nenu neba, e lɛrɛ nebɔs e ji yey mɛ.

²⁵Jeng de e ha ha rat, hwo sey tsak o na yɛ wɛt, yaga pyɛ̂ byɛm-byɛm tyaama ya sé e ji yey mɛ,

²⁶ka a bang bɛɛ ves mɛ na kwɛlɛng, neves mɛ ne kulu hɛ e tulâ bemat.

²⁷Mwat de e cing revɔng, ê gaba e ji rɛ, ko yɛ de a biring gwofwa gwô hwo e ra yɛ.

²⁸Mwat hâ nebɔs e kyɛ́ ɛ vemo de e ha e ra yɛn, ko mwat lem mɛɛsɛs e wey na yɛn.