Read berom Cīnat Neha 27 Bible Online

Cīnat Neha 27 - berom bible

Cīnat Neha 27

¹Hwo kwon dak ragey e ra nahwol wɛt, yaga hwà tɔk pyɛ de pɔlɔ hining hê vey mɛ wɛt.

²Tik mwat hwak a somo hwo, ko hwo tó mō wɛt, kwɛnɛt, ko hwo na nu mō wɛt.

³Gwofwa gwa sé dirik, ko bezɛk ba dal, ko shôm tɔn ya dal ɛn mwa na nedirik.

⁴Shom pep ya sé vyes, ya sé sede tɛmɛ-nshi, ko wa e tɔk tumal a repugu ɛ?

⁵Nduga gyong wɛshɛrɛk e ra tɛ̂ yey e lɛrɛ.

⁶Baram yi na sâ yey mō ba sé tsak o, ko kulâ wo repugu ha sé zɔng-reng.

⁷Mwat de a ga sirik e bɛrɛng shok ya sé kis, ko na womo de e wok vyong, kayɛ pyɛ kpashak ya ta.

⁸Sede non de ka hala rɛngɛ kɛ, a sé ano, na mwat de a hala lɔ mɛ.

⁹Něy nesang hyɔɔlɔl ne tɛ̀ yey pyɛng, ko sâ mwin a dal cɔgɔ̂t nesang hyɔɔlɔl.

¹⁰Sa mō, na sâ da mō hwo ye waa a hɛn wɛt, ko hwo kwon wɔ e lɔ gwa mō tuk de reyɔm ra sɛ̀ o wɛt. Nduga mwat vwara wo bagat e ra gwa de a sé yikyik.

¹¹À hwey hom vɔk netsitsɛng na hwo pɛngɛ a me yey, yaga na me vɔk nû hanat a womo de e haras a me.

¹²Mwât nehywɛ e di kya ko a lɛrɛ tó mɛ, ko wo dunus e rimi hɛ zɔng, ko e nàra sɔ̂ reyɔm.

¹³Mwat winde e vow na a tumal a kwɛnɛt e hwɔpɔ, gbing-gbing na be vɔk pyɛ́ mɛ e selek, sɛ̌ jeng de ba tala badu mo.

¹⁴Mwat de e kyulsa sa mɛ na gbɔng fwɔ hywiinin nagasi, bê yang hɛ a môk gawey.

¹⁵Sede rwâk kpam-magéy, ano de hwâ shom na shɔ̂k jim a sé,

¹⁶na hwo tɛ̀ ɛ a sǎ yuu, a dal na sé begelek be kaba gul, kɛ be gunung něy e vwɔ.

¹⁷Bá he lɔ̌ ba, ko mwat e masa yi na mumwɛ.

¹⁸Womo de e gyenges retin regwi ê re nèy rɛ, ko womo de e bɛrɛng dalɔ mɛ naka bê nɔng ɛ nerey.

¹⁹Sede remo bayis na rezinâ bayis e nshi, ano de yey mwat ye ra na yɛ.

²⁰Kwɔ̂n bevuvwel na wala be sang sirik wɛt, ano, bayis mwasi be sang sirik nesheneshey wɛt.

²¹Be mara dyam pyɛng na dyam shinang na kya, ko hwó tɔk mwat yi na gwong de be somo hɛ.

²²To tɔn e lulum na rum sede pyɛ̂ yeneng, ko mwa ano netɔn mɛ nê gas ɛn na yɛ wɛt.

²³Tɔk naka sangâl kara mō, ko tɛ̀ nehywɛ mo na vyēl mō.

²⁴Nedanerey ne nára gbak-gbak wɛt, yaga kpin negwɔm wo sangal vɔk e mwa nezamang wɛt.

²⁵Jeng de sɔng gwa ga tɛ́ ɛ vit, ko pwas gwo turuk, ko ba ga bang sehwêy beraku de ba ga yɛt.

²⁶Nèy vyēl pyɛng nê nɔngɔs berugu mō, ko vyēl shi, dyâm sey cwɛl,

²⁷nevasal vyēl shi nê vey a hwo yaga pyɛ̂ re, pyɛ̂ re yaga belɔ mō tanga behwông fwom mō.