Read berom Cīnat Neha 28 Bible Online

Cīnat Neha 28 - berom bible

Cīnat Neha 28

¹Bemat beves be tele ka de be ró ɛn wɛt, ko vê necik ba vɔk yey ting sede gukum.

²Jeng de bemât vwel be ragas banɛn he vɔk negwɔm pyak, ko na mwât tɔ́k-tsik, hê re nuyel.

³Mwat pwɛng de e tak a pwɛng, a sé tyɛng na rwak gul de wo wey na pyɛ́.

⁴Vemo de be hala badu be somo bemat beves, ko vemo de be gyeng vɛ, be ra kyisa na yɛn kayɛ jeng.

⁵Bemat beves ba tɔk netsîk gas badu e tē wɛt, ko vemo de be jama Dagwi Darwey ba tɔk netsîk hɛ̄ mwa.

⁶Pwɛng de negwɔn mɛ na sila gyat, a dal darwey de begwong mɛ ba sé gwɔdɔrɔk.

⁷Womo de e gyenges badu a sé hwêy netsitsɛng, ko nesa na bemât kat rwéy, be tɛ̀ a da mɛn rekyen.

⁸Yɛ̀ de e gwɛsɛ nedanerey mɛ yi e ndi tanga pyɔlɔ, a sé wo dura a bepɛng nerat de e vɔk pyɛ́ mo mwa.

⁹Sede mwat a bang betong mɛ yi e wok badu, ko won mɛ ha sé pyɛ byɛm-byɛm.

¹⁰Womo de a tɛ̀ wo necik e gwong vwes, ê gaba e ji revɔng mɛ, ko vemo de ba sila gyat bê sey nedanelɔ nerat.

¹¹Darwey e di mɛ a vɔk netsitsɛng, ko pwɛng de a vɔk tɔ́k-tsik ê kulu hɛ.

¹²Jeng de vê necik be di wɛng, gbɔng nerat ne sè, ko jeng de beves be tut, bemat be lɛsɛ bato mɛn.

¹³Yɛ de e lɛsɛ neburu mɛ ê re nuyel wɛt, ko womo de e kulu, e gas ɛ na nɛ, bê tosho reyɔm mɛ.

¹⁴Wo wɛng a womo de e sap Dagwi Darwey jojot, ko womo de a tɛ̀ yey mɛ kashalang ê gaba e ji reyɔm.

¹⁵Sede gukum de wo lulum kɛ cwey de ye kyè vey hwo e ra pyɛ, ano gwɔ̀m vwes a sé na bemat bepɛng.

¹⁶Gwɔ̀m de vit a netsitsɛng a sé wo midra, ko wo kyɛ́ ɛ marâ yis ê gwɛ̌ nelis nepɔlɔ mɛ.

¹⁷Mwat de nemî mwat hwak na sé e ra yɛ, ko mwat hwak e sɛlɛ hɛ wɛt.

¹⁸Womo de e kyè e gwông nɔng nerey bê sey ɛ, ko wo kwɛlɛng e gwong mɛ ê gaba e revɔng.

¹⁹Mwat de e how cap mɛ ê vɔk pyɛ̂ re pyak, ko womo de e raa bemât nása bol ê vɔk nepɛng.

²⁰Mwât tsak o ê sila na nerat, ko womo de e vow e sɛ̀ nedanerey ziri, bê tik nà tabak hɛ wɛt.

²¹Simô to ha sé naka wɛt, ko yaga kekpam-tuk de ka vey pyɛ wɛt behak be yel e buru.

²²Mwât remɛ̀ e vow e ra sɛ̂ nedanerey, ko e tɔk wɛt nepɛng nê hwo e ra yɛ.

²³Womo de e gyong mwat, e bama mo e vɔk nemi nepɛng, e ra womo de e rɔgɔm nu.

²⁴Mwat de a sey ɛ pyɛ̂ da kɛ neng mɛ na a ye, “A sé buru wɛt”, wane a sé sâ mwat wéy zɔng.

²⁵Mwât kat cwey e sogo na yol, ko womo de e tɛ̀ gap e ra Dagwi Darwey ê sè wɛng-wɛng.

²⁶Womo de e tɛ̀ gap e barê yey mɛ a sé tɔn, ko womo de e kyè e gwong netsitsɛng, bê séy ɛ.

²⁷Womo de e nɔngɔs bepɛng, ê bidɛ wɛt, ko womo de e bangas bayis mɛ be kyini hɛ.

²⁸Jeng de bemat beves be sɛ̀ nerey, bemat be lɛsɛ hɛn, ko jeng de vit a hɛn, vê cik be gwɛ̌ hɛn.