Read berom Cīnat Neha 29 Bible Online

Cīnat Neha 29 - berom bible

Cīnat Neha 29

¹Yɛ womo de be gyong ɛ kayɛ jeng, ko e tɛ̀ yey mɛ gbarak, sana tɔk, bê kwɔrɔ hɛ, ko vit à hwal.

²Jeng de vê cik ba sé e negwɔm, bemat be vɔk yey pyɛng, ko jeng de bemat beves be re negwɔm, bemat be rus na rezot.

³Womo de a tɛ̀ yey e ra netsitsɛng e tɛ̀ da mɛ a vɔk yey pyɛng, ko womo de e wuna to na bedebeves e wey na nedanerey mɛ.

⁴Yi na gas shɔt e tē, gbɔng gwɔ̀m e tɛ̀ vwel he tumal gak, ko womo de a kat seres té show e wey na vwel o.

⁵Mwât ha na mwât vwara mɛ na nu mɛɛsɛs, e lásha a bol mwat o segun.

⁶Mwat vwes, neburu mɛ nê vo ɛ, ko wo cik, e ra lwɛlɛ na yey pyɛng.

⁷Wo cik e tɔk pyɛ de ya sé ye pwɛng, ko mwat vwes a vɔk tɔ́k-tsik hane wɛt.

⁸Neha vê byɛs ne dak kya e repomo, ko wo netsitsɛng e tɛ̀ shom ye ye rɔ̀s.

⁹Sede mwât netsitsɛng e tó cuna na tɔn, tɔn e ra wɔng, e lolong, ko be yong pyɛ cak wɛt.

¹⁰Bemât shushu nemi be bɛɛ wo sila gyat ves, ko vê cik be tɛ̀ yey na yɛ.

¹¹Tɔ́n e dura shom mɛ mwa, ko wo netsitsɛng e yɛklɛ yey yuu.

¹²Sede gwɔ̀m e wet betong na neha bɔs, mwa bemât fwom mɛ bê sè beves.

¹³Mwat pwɛng na mwat de e tak a yɛ be man, ko Dagwi Darwey e nɔngɔs hɛn neken mwa hɛn.

¹⁴Sede gbɔng gwɔ̀m e gas a bepɛng shɔt e tē, negwɔm mɛ nê tumal gak.

¹⁵Tábak tanga gyong hé nɔng netsitsɛng, ko hwey de ba hala hɛ, hé vɛ̀sɛ a neng hɛ na rekyen.

¹⁶Jeng de bemat beves be re negwɔm, neburu ne gwɛsɛ hɛn, ko vê cik bê bɛrɛng gaba mɛn.

¹⁷Tabak hwey mo ko hê nɔng o pɔngɔ, hê vey na neta.

¹⁸Kwɔn de vit a negwi-ywey yi na Dagwi bemat o be tɛ́ ɛn kashalang, ko wo wɛng a womo de e gyeng Badu Dagwi.

¹⁹Mwât fwom e wok tabâk nu zɔng wɛt, ka a ka tɔk retin há mo, ko e tɛ̀ tong wɛt.

²⁰Hwà di mwât myɛ̂t nu e há mɛ a? Tɔ́n a dal na sɛ̂t yey e ra yɛ.

²¹Sede hwà kat râ nehywɛ na mwât fwom yi e nebot mɛ, ê jut to mɛ sede hwey mō.

²²Mwat yey-pep e vɛ̀sɛ na cuna, mwât shom bagat e vɛ̀sɛ na neburu pyak.

²³Dâk kaa mwat hé vey a yɛ na byɛs, ko wo dyɛ̂ng to ê sɛ̀ nerey.

²⁴Sâ gbik, e kyɛ́ ɛ tó mɛ, be tabak hɛ, e sǎ yuu e duk shɔt ko Dagwi e kyini hɛ.

²⁵Vɔ̂k bengyip mwasi he tɛ̀ a hwo segun, ko Dagwi Darwey e sey womo de a tɛ̀ gap mɛ e ra yɛ.

²⁶Pyak be jama nemi nepɛng yi na gwɔ̀m, ko yi na Dagwi Darwey mwat e sɛ̀ yɛrɛ shɔt e tē.

²⁷Mwat de vit a tsak o a sé pyɛ byɛm-byɛm na vê cik, ko womo de gwong mɛ gwa sé cik a sé pyɛ byɛm-byɛm na vê neves.