Read berom Cīnat Neha 3 Bible Online

Cīnat Neha 3 - berom bible

Cīnat Neha 3

¹À hwey hom, hwo ye bam a basa hom wɛt, ko tik yey mō ye gyeng badu hom,

²na nepɔlɔ tanga neshey mō ne gwɛ hɛn, ko nè nɔng o netyang.

³Hwo tik na tsak tɛ̂ yey na tsak o be gas ɛn na hwo wɛt, rɔgɔs pyɛ́ yane e ra fwɔ mō sede lwɛlɛ̂ fwɔ, jɛk yɛ e ji yey mo.

⁴Ano hwô vɔk nemi nepɛng na reza rerat, e nuyel Dagwi tanga bemat.

⁵Tɛ̀ gap mwa e ra Dagwi Darwey na yey mo rining. Hwo kwon ye yɛndɛng e tɔk mō wɛt.

⁶E ji kayɛ pyɛ mō ha nuha mɛ, ko yɛ ê tɛ̀ begwong mō be sè berat.

⁷Hwo kwon tɛ̀ tó mo hwà vɔk netsitsɛng wɛt, sap Dagwi Darwey, doyo gwong mō yi e pyɛ́ vyes,

⁸hê tɛ̀ a hwo netyang e rebek mō, ko bekup mō wɛng-wɛng arɔng.

⁹Nɔng Dagwi Darwey nerey na pyɛ́ mō, tanga pyɛ̂ yɛ mɛsɛng de be yɛt bwal yɛ,

¹⁰ano, begban mo bê sila mɛf na pyɛ̂ yeneng, ko kɛ̀ngɛ bê sila na nshi anap pyak.

¹¹À hwey hom, hwo byɛs tabâk Dagwi Darwey, kɛ hwo ruru na gyong mɛ wɛt,

¹²Dagwi Darwey e gyong wo yey mɛ, sede da e gyong hwey de e feng na hɛ.

¹³Wo yey pyɛng a womo de a vɔk netsitsɛng, na womo de a vɔk tɔ́k-tsik arɔng,

¹⁴yaga pyɔlɔ̂ nɛ ya dal yê dyam pyɛng, ye vey na redàk de ra dal dyam shinang na nerat.

¹⁵Netsitsɛng na dal beta berat, vit a pyɛ de hwô vɔk cwey o de bê tyɛngrɛ na nɛ.

¹⁶Neken nelis na sé e vwɔ yege nɛ, e vwɔ mwɛlɛ̂ng nedanerey na gbɔng nerey.

¹⁷Begwông netsitsɛng ba sé vê pɛngɛ yey, ko mwa begwông nɛ̀, ba sé netyang.

¹⁸Na sé sede cɔgɔt neken na vemo de ba firik nɛ, vemo de ba tanga kaba nɛ, be yila hɛn a vê yey pyɛng.

¹⁹Dagwi Darwey, yi na netsitsɛng mɛ a yong jey, yi na tɔ́k mɛ a tɛ̀ lagwi.

²⁰Yi na tɔ́k-tsik mɛ berep ba nusu, ko bale ba tɛ̀ mwɛngɛ e vwel.

²¹À hwey hom, vɔk netsitsɛng tanga nehywɛ, hwo tik ye hywit a hwo wɛt,

²²ko yê sè neken na hwo, na pyɛ̂ tɔrɔ yaga fwɔ mō.

²³Ano hwô kyè tyang e ji gwong mo, ko hwô tiri bwol mo wɛt.

²⁴Sede hwà dyɛng, hwô wok bengyip wɛt, jeng de hwà dyɛng, hwô wɔ nevwa tyang.

²⁵Hwo wok bengyip pyɛ de yê vey hák, kɛ reyɔm de re wey na bemat beves wɛt,

²⁶Dagwi Darwey ê tɛ́ ɛ gap mō, ko ê gyeng bwol mō, na hwo kwon gaba e segun wɛt.

²⁷Hwo kwon tik dura nerat na vemo de na jam yaga yɛn, jeng de hwà vɔk gâp ra mo, re nuyel.

²⁸Hwo kwon yang mwat vwara mo, “Kyè, na hwo to vey nahwol na me nɔng o.” Sede hwà vɔk, nɔng ɛ e jeng o zɔng.

²⁹Hwo yong pyɛ cak vyes wɛt yaga mwat vwara mo, womo de a sé sangal tyang na hwo, ko a tɛ̀ gap mɛ e ra hwo.

³⁰Hwo tó cuna na mwat hwak vit a tin, jeng de a ga mǎ hwo wɛt.

³¹Hwo ra repugu na mwât yol kɛ hwo kasa pyɛ cak e begwong mɛ wɛt.

³²Dagwi Darwey e bɛɛ mwât kwɛlɛng byɛm-byɛm, ko vemo de ba sé cik e jut ɛn na yey mɛ mwa.

³³Dagwi Darwey e kyini lɔ̂ mwat vwes, ko e tɛ̀sɛ nerat e ra lɔ̂ wo necik.

³⁴E shɛgɛsh vemo de be shɛgɛsh behak, ko vemo de be dyɛng bato mɛn e dura a yɛn simo.

³⁵Vê netsitsɛng bê re nedanelɔ nerey, ko betɔn bê sɔ rekyen.